Manslandsliðið í fótbólti vann í dag bronsudystin í venjingarkappingini Baltic Cup 1-0 móti Lettlandi.

Innskifti Hanus Sørensen skoraði málið í seinna hálvleiki eftir góða sending frá Jóannesi Bjartalíð. Hanus lat seg úr troyggjuni, og við teksti á troyggjuni innanfyri ognaði hann málið systir síni, sum hevur krabbamein.

Hanus hevur nú skorað fimm mál fyri Føroyar og nærkast spakuliga málmetinum á tíggju mál, sum Rógvi Jacobsen og Klæmint Olsen deila sínamillum.

Dysturin í dag var eins og ósigurin fyri Estlandi leygardagin ein typiskur vinardystur. Tað hendi millum lítið og einki. Men málið og sigurin bjargaðu føroysku æruni. Petur Knudsen sendi eisini eitt gott fríspark á stongina.

Í heyst skulu Føroyar spæla Nations Cup móti Moldova, Slovakia og Kasakstan.

Mynd: Hans Erik Danielsen – fsf.fo

Fyrverandi landsliðsleikarin í fótbólti, Oddmar Færø, er deyður 62 ára gamal.

Hann var ein av okkara frægu fótbóltsleikarum í 80’árunum, og sambært FaroeSoccer náddi hann í 1993 at spæla ein almennan landsdyst, eftir at føroyskur fótbóltur fekk millumtjóða góðkenning. Umframt spældi hann eisini fýra landsdystir fyrst í 80’árunum.

Oddmar var sera evnaríkur og var millum annað tikin út til danskt ungdómslandslið saman við ongum minni enn Michael Laudrup. Hann spældi eisini við Glostrup IC í Danmark.

Seinni valdi hann tannlækna­yrkið, men spældi tó við B36 og vann FM við B68 í 1992.

Oddmar Færø er partur av einari heilt serligar ættarsøgu í føroyskum fótbólti.

Pápi Oddmar, sum eisini æt Odmar við einum d, var eisini góður fótbóltsleikari og landsliðsleikari, og sonur Oddmar, sum sjálvandi eitur Odmar vi einum d, hevur nú í mong ár verið fastur á landsliðnum og er tað framvegis.

Grein um teir tríggjar á fsf.fo

Ivan Eginsson Eysturland hevur skrivað hesi orðini um Oddmar Færø út á Facebooksíðuna World Cups & Euros 1970-1998

Danski landsliðsleikarin, Christian Eriksen, small um í kvøld í venjingardystinum móti Ukraina í Odense. Dysturin varð steðgaður beinanvegin, og bæði danskir og ukrainskir spælarar gjørdu ring um hann.

Hann fekk skjóta hjálp og reisti seg aftur eftir einari løtu. Hann gekk sjálvur av vøllinum.

Danska fótbóltssambandið boðar frá, at hann er við vit og hevur tað gott eftir umstøðunum. Hann varð koyrdur á sjúkrahús til nærri kanningar.

Støðan minti nógv um tilburðin í EM í 2021, tá ið Eriksen eisini small um og fekk innbygdan ein hjartakvikil.

Dysturin móti Ukraina verður ikki spældur liðugur, og liðið er sjálvandi nógv ávirkað av hendingini.

B36 boðar í kvøld frá, at Pætur Petersen kemur aftur í felagið og verður tøkur, tá flytingarvindeygað letur upp 15. juni

Pætur var orkuríkur áleypari í B36 í fjør. Hann valdi í vetur at fara til Danmarkar at spæla fyri Hillerød, har tað hevur verið ógvuliga avmarkað við spælitíð.

Hann fær nummar 11 á ryggin, tí Torgeir Børven samstundis gevst í B36. Hann spældi sín seinasta dyst á Toftum í gjár har hann skoraði og vann brotsspark

Børven fer av persónligum ávum aftur til Noreg. Hann spældi 14 dystir og skeyt seks mál fyri B36.

07 Vestur boðar í kvøld frá, at felagið er komið ásamt við venjaran, Michael Schjønberg, at enda samstarvið.

Schjønberg kom aftur til 07 Vestur tíðliga seinasta kappingarár, eftir at 07 hevði eina sera vánaliga byrjan upp á kappingarárið. Hann vendi gongdini og vágamenn bjargaðu sær undan niðurflyting í seinasta umfari.

Higartil í ár hava úrslitini ikki verið serliga góð, og 07 Vestur er aftast í Mestaradeildini, Í gjár taptu teir 2-1 á Skála.

Michael Schjønberg spældi í 90’árunum á danska landsliðnum og var eisini týskur meistari við Kaiserslautern.

Meistaradeildin menn
HB – Víkingur 0-0 (0-0)

Besti maður á vøllinum í Gundadali í dag var dómarin. Hann dømdi ein feilleysan dyst, og tað var nú heldur ikki so torført, tí liðini bæði HB og Víkingur vóru ógvuliga spøk og tannleys í sínum spæli.

Tað var torført at síggja, at hesi bæði liðini hava verið partur av oddinum í føroyskum fótbólti seinnu árini.

Í fyrra hálvleiki var einasti glottin á vøllinum Aron Benjaminsen, sum voldi verjuni hjá HB stórar trupulleikar við sínum avbjóðandi spælistíli, tá ið hann úr høgru síðu rak við vinstra beininum inn í vøllin. Tvær ferðir rakti hann stongina, og tað var í tí stóra heila tað sum hendi í fyrra hálvleiki.

HB fekk álopsliga als einki at hanga saman fyri steðgin. Miðvøllurin megnaði als ikki at halda upp á bóltin. Tí var mest vandi á ferð, tá ið bólturin var sparkaður fram. Í heilt fáum førum var eisini eitt lítið sindur vandamikið framman fyri málið hjá Víkingi.

Fyrst í seinna hálvleiki var besta løtan hjá HB. Tað riggaði at leggja trýst á Víking langt frammi á vøllinum, og tað spurdust nakrar góðar støður burtur úr. Men veruligur vandi var ikki ár ferð.

HB hevði eisini nógvar deyðbóltar, men tað eru lítið veiggj í bæði fríspørkum og hornaspørkunum, sum Dan í Soylu øll somul sendi í alt ov bleytan boga inn móti málinum hjá Víkingi. Bleyt fríspørk eru eingin hóttan í dagsins fótbólti, og eru alt ov løtt hjá málverja og verju at rudda burtur. Eitt sindur løgið, at HB ikki hevur onkran annan møguleika enn lata Dan taka deyðbóltarnar.

Móti endanum av dystinum var Víkingur tættast við at vinna dystin. Fyrst fekk Jørgen Nielsen ein rimmar møguleika, tá ið hann slapp at skjóta púra leysar, tá ið Víkingur lættliga slapp at spæla seg fram í vinstru síðu. Eisini hevði Sølvi Vatnhamar ein góðan møguleika, tá ið hann skallaði við nærmastu stong.

HB hevði sínar bestu møguleikar heilt móti endanum. Fyrst Dan sum ikki fekk ordiliga skot á, og síðan Ási Dam, men Bárður á Reynatrøð gjørdi vinkulin lítlan og bjargaði.

Dysturin á dystir.fo

Stigatalvan á dystir.fo

Skála vann uppibornan 2-1 sigur á 07 Vestur heima á Mýruhjalla í kvøld. Øll málini komu í seinna hálvleiki. Í fyrra hálvleiki brendi Skála brotsspark.

Gestirnir løgdu seg móti gongdini í spælinum á odda við máli frá Jonathan Flensborg, tá ið verjan hjá Skála ikki kláraði at rudda burtur.

Skála svaraði beinanvegin aftur. Fyrst við brotssparki frá Simon Jørgensen og síðan skoraði Maxwell Effiom til 2‑1 eftir upplegg frá Markus Isaksen

Skála hevði greiða leikliga yvirvág, fleiri góðar møguleikar og eina rúgvu av hornaspørkum.

Við sigrinum kom Skála upp um niðurflytingarstrikuna, meðan 07 Vestur framvegis er aftast í Meistaradeildini.

Dysturin á dystir.fo

Stigatalvan á dystir.fo

Meistardeildin menn
B36 – 07 Vestur 1-0 (1-0)

B36 vísti seg sum eitt veruligt topplið í Gundadali í dag, tá ið 07 Vestur var á vitjan.

Allan fyrra hálvleik vóru vágamenn minst líka góðir sum B36, og gestirnir høvdu eisini nógv teir størstu málmøguleikarnar.

Í einum føri høvdu teir tríggjar góðar møguleikar í einum. Men fyrst bjargaði Silas Eyðsteinsson, so bjargaði Símun Sólheim á strikuni, og seinasti møguleikin varð skotin upp um. Eisini hevði 07 Vestur ein púra leysan skallara, men inn fór bólturin ikki.

Og so beint fyri hálvleik legði Boubacar Dabo hjá B36 innfyri úr vinstru síðu, og har kom Tobias Hansen og skallaði bóltin í málið.

Tobias tók harvið av møguleikanum, nú hann byrjaði inni. Umframt at skora arbeiddi hann sera hart allan dystin og vann við síni høgu hædd nógvar luftbóltar. Eisini hevði hann onkra aðra góða atsókn.

Í seinna hálvleiki hevði B36 nógv meira tamarhald á støðuni. Teir høvdu eisini bóltin í málinum eftir frísparksinnlegg, men av onkrari løgnari orsøk, so skuldi frísparkið takast umaftir. Á endurtøkunum hjá Televarpinum var torført at síggja hví.

07 Vestur royndi at koma longri fram seinasta korterið, men teir skaptu ongan møguleika í seinna hálvleiki, og samanumtikið var tað í lagi, at B36 vann dystin.

Við sigrinum vísir B36 veruliga, at teir meina tað í álvara, at teir vilja vera við í FM-stríðnum, eisini hóast lyklaleikarar sum Heini Vatnsdal og Jógvan Gullfoss eru skaddir.

Dysturin á dystir.fo

Hini oddaliðini vunnu eisini í dag. NSÍ vann 1-0 móti EB/Streymi á útivølli. Petur Knudsen skoraði við høvdinum. KÍ vann 2-1 móti AB, sum setti spenning í dystin móti endanum. Í Gøtu setti Skála eisini spenning í dystin, tá ið teir minkaði til 2-1, men eisini Víkingur helt stand. Harvið vunnu allir favorittarnir í dag.

Dysturin millum B68 og HB var avlýstur av ov nógvum vindi á Svangaskarði. Hann verður spældur í morgin klokkan 18.30.

Stigatalvan á dystir.fo

Seinasti dysturin hetta kappingarárið heima móti Brentford gjørdist ein spegilsmynd av elendiga kappingarárinum, sum fyri okkum Liverpoolfjepparar tíbetur endiliga er av.

Champions League stóð upp á spæl. Troyggjurnar vóru nýggjar. Salah og Robertsen byrjaðu í sínum seinasta dysti fyri Liverpool, og eisini Alisson var við aftur. Rio Ngumoha slapp eisini at byrja, akkurát sum tey flestu ynsktu.

Søgan var tó tann sama. Vit høvdu bóltin nógv, men bóltumgangurin var seinur, og vandin fyri at sovna frammanfyri skerminum var til staðar.

Tann einasti á vøllinum, sum sá út til at taka dystin í álvara, var Salah, sum tyktist vilja enda ordiliga í Liverpool, eftir eitt vánaligt kappingarár. Hann var eisini besti maður, og átti næstseinasta fót á bóltinum, tá ið Jones skoraði. Hví hann skuldi takast út so týðliga, vísir bara, hvussu lítið skil er á í ár.

Málið kom eftir skjótálop, og tað sama gjørdu hinir báðir stóru møguleikarnar. Eisini rakti Salah stongina við einum frísparki. Restin av tíðini koyrdi spælið í tómgongd.

Heldur ikki hesuferð kláraðu vit at halda ‘nullið’. Tað hava vit bara gjørt tíggju ferðir í vetur. Tilsamans er 53 mál farin inn, og tað er tað vánaligasta, síðan farið var yvir til 38 dystir mitt í 90’arunum.

Javnandi málið endurspeglaði verjuavrikið seinasta árið. Øll álop hjá mótstøðuliðnum gerast vandamikil. Ein avrætting, Robertson klárar ikki fram um áleyparan, og so er mál.

Eitt vánaligt kappingarár endaði uppaftur verri. Vit vunnu ikki í fýra teimum seinastu dystunum og sóu ikki út til at tíma at vinna.

Glottarnir síðan august kunnu teljast á einari hond. Ein góður dystur mót Real Madrid, og onkur hendinga brúkiligur dystur móti vánaligari mótstøðu í Champions Leage. Heimadysturin móti Aston Villa var eisini í lagi. Annars verða tað helst bara langskotsmálini hjá Szoboszlai, sum vit fara at minnast aftur á.

Slot hanga vit nokk upp á summarið yvir, Men tað verður ógvuliga stórt trýst á honum frá fyrsta leikdegi í august. Spuringurin er um hann yvirlivir oktobur og novembur? Tað er lítið, sum bendir á tað í løtuni, tí tað er sjáldan, ógvuliga sjáldan, at ein venjari klárar at venda einari so vánaligari gongd.

Tom Lund er deyður 75 ára gamal. Her heima eru helst fá sum kenna hann. Men hann verður mettur sum tann besti norski fótbótbóltsleikarin nakrantíð, í hvussu er áðrenn Erling Haaland.

Tom Lund spældi alla sína yrkisleiðfyri Lillestrøm frá 1967 til 1982. Hann gjørdist eitt ímynd í felagnum og í norskum fótbólti sum heild. Hann spældi 47 landsdystir og skoraði 12 mál fyri Noreg .

Tommy, sum hann varð róptur, var kendur fyri sítt lága tyngdarpunkt, sítt kvika rykk og at vera duga líka væl við báðum beinum.

Stóru feløgini royndu at fáa hann. Ajax vildi hava hann sum avloysara fyri sjálvan Johan Cruyff, og eisini Bayern München vísti stóran áhuga. Men Tom Lund segði nei og valdi at verða verandi í Lillestrøm . Tað gjørdi hann til eina veruliga fólkahetju.

Hann førdi Lillestrøm inn í gulløldina við bæði meistaraheitum og steypasigrum. Hann var eisini venjari í felagnum.

Uttanfyri Åråsen, leikvøllin hjá Lillestrøm, stendur standmyndin Steget, sum minni um tann leikaran, sum nógv í Noregi halda vera tann størsta nakrantíð .

Manchester United boðar í dag frá, at Michael Carrick heldur fram sum venjari hjá stórfelagnum.

Hann hevur fingið góð úrslit, sum fyribilsvenjari síðan hann tók yvir í januar, eftir at Ruben Amorim varð koyrdur.

Partarnir eru samdir um ein tvey ára sáttmála við møguleika fyri einum ári afturat.

Undir leiðsluni hjá Carrick spældi liðið seg upp á 3. pláss og tryggjaði sær pláss í Champions League komandi kappingarár.

Carrick spældi 464 dystir fyri United sum miðvallari og hevur áður verið hjálparvenjari í felagnum.

Manchester City váttar í dag, at venjarin seinastu tíggju árini, spanski Pep Guardiola, gevst sum venjari í felagnum.

Hann hevur hesi tíggju árini vunnið seks ensk meistaraheiti, eitt Champions League, trý FA‑Cup, fimm League Cup og eitt heimsmeistaraheiti fyri feløg. Í ár hevur City vunnið League Cup og FA-cup, meðan teir enda nummar tvey í Premier League.

Guardiola hevur ikki bara vunnið nógv, men verður av fótbóltsserfrøðingum mettur sum ein venjari, ið hevur ment fótbóltsspælið til heilt nýggjar hæddir.

City heiðrar honum nú við at uppkalla nýggju landsíðuna eftir honum, The Pep Guardiola Stand, og einari standmynd uttanfyri.

Guardiola sigur, at tíðin er komin, og at einki varir í allar tíðir.

Enzo Maresca er sambært bretskum miðlum favorittur at taka yvir.

Fyrr í dag var Áki Samuelsen tikin út til føroyska landsliðið fyri fyrstu ferð, og í kvøld spældi hann ein lítlan hálvleik fyri Mjällby í 1-1 javnleikinum móti Elfsborg á útivølli.

Elfsborg legði seg fram um tíðliga í dystinum, og Mjällby janvnaði beint eftir stegðin.

22 ára gamli hoyvíkingurin kom inn tíggju minuttir eftir stegðin og stóð seg væl og bjóðaði verjuni av nakrar ferðir.

Mjällby er á fjórða plássi í bestu svensku deildini

Stigatalvan í Allsvenskan

Enska stórfelagið, londonfelagið, Arsenal, gjørdist í kvøld enskur meistari uttan at spæla, tá ið kappingarneytarnir, Manchester City, ikki megnaðu at vinna á útívølli móti Bournmouth.

Tað er fyrstu ferð í 22 ár, at felagið úr Norðurlondon er meistari.

Arsenal hevur verið fremst í Premier League meginpartin av kappingarárinum, men er ongantíð sloppið heilt leyst av Manchester City, sum so spakuliga hevur vunnið seg aftur til styrkini frá undanfarnum kappingarárum.

Arsenal hevur kortini hildið stand, hóast mátin at spæla upp á, við nógvum deyðbóltum innfyri, ikki hevur verið so væl dámdur av øllum.

Spaniólin, sum áður spældi við Arsenal, gjørdist venjari hjá felagnum í 2019, eftir at hava verið hjálparvenjari hjá júst Pep Guardiola í Manchester City. Nú hevur Arteta so bast lærimeistaranum og hevur gjørt Arsenal til enskar meistarar.

Arsenal er eisini í finaluni í Champions League móti Paris SG, og kann sostatt eisini gerast evropameistari fyri lið. Tann finalan verður spæld leygardagin 30. mei.

Kvøldsins dystur millum Bournmouth og City endaði 1-1. Erling Haaland tryggjaði City janvleikin í yvirtíðini, og tað hevði við sær, at Bournmouth misti møguleikan at spæla seg til Champions League komandi kappingarár..

Hjartaliga til lukku allir føroyskir Arsenalfjepparar

Southampton missur møguleikan at flyta upp eftir eina njósnaragølu, sum Sky Sports hevur navngivið spygate.

Middlesbrough fær í staðin plássið í uppflytingarfinaluni móti Hull City 23. mai.

Southampton byrjar eisini við fýra minusstigum næsta kappingarárið í Championship. Felagið kann tó kæra avgerðina.

Middlesbrough sigur, at hetta sendir týðilig boð um ítróttarligt rættvísi.

Gølan byrjaði 7. mai, tá ið ein maður úr Southampton varð sæddur filma eina venjing hjá Middlesbrough.

Maðurin royndi at flýggja inn á eina golfbreyt og skifti klæðir, skrivar BBC.

Southampton vann annars røkkstøkk-dystirnar millum feløgini, og skuldi eftir ætlan spæla uppflytingarfinaluna.

Við 1-0 sigri á Burnley er Arsenal nú heilt tætt við fyrsta meistaraheiti síðan 2004.

Kai Havertz skoraði inn eftir hornaspark frá Saka tíggju minuttir fyri steðgin.

Arsenal hevur nú alt í egnum hondum og kann vinna Premier League longu týskvøldið, um Manchester City ikki vinnur sín dyst móti Bournmouth.

Sunnudagin kann Arsenal, so avgera alt sjálvt móti Crystal Palace á útivølli.

Meistaradeildin Menn
HB- EB/Streymur 3-4 (0-3)

Sundalagsmenn komu í kvøld upp um niðurflytingarstrikuna og gjørdu samstundis kreppuna í HB enn djúpari, enn hon var frammanundan.

4-3 vann EB/Streymur í Gundadali, eftir at teir førdu 3-0 í hálvleikinum.

Grundalagið undir sigrinum var lagt beinanvegin í dystin, tá ið gestirnir skoraðu tvey í fyrstu tíggju minuttunum.

HB vaknaði ikki fyrr enn í seinna hálvleiki og megnaði at leggja stórt trýst á EB/Streym. Men tað var ikki nokk, og sundalagsmenn vóru ovurfegnir fyri tey trý stigini.