KÍ boðað í gjárkvøldi frá, at Allan Drost gevst sum venjari hjá besta kvinnuliðnum, sum gjørdist føroyameistari í ár.
Av persónligum orsøkum er danski venjarin givin í felagnum. Allan kom fyri einum ári síðan til Klaksvíkar.
Hópurin venur árið út undir leiðslu av Rannvá B. Andreasen og Rúnu Bjartalíð.
KÍ kvinnurnar hava verið føroyameistarar 24 ferðir síðan 1997.
Cristiano Ronaldo gevst á portugisiska landsliðnum eftir HM í 2026 í USA, Kanada og Meksiko. Tað segði hann á tíðindafundi í Saudi-Arabia.
Hann sigur, at tá verður hann 41 ár og tí er tað rætta tíðin at gevast.
Hann viðgongur, at tað verður torført at leggja fótbóltin frá sær, og at hann helst fer at gráta.
Men hann gleðir seg eisini til meira tíð saman við familjuni og til síni frítíðarítriv.
Ronaldo hevur nøkur ófatilig landsliðsmet. Hann hevur spælt 225 landsdystir og skorað 143 mál. Hann hevur flest hattrick, flest mál í HM-undankapping og hevur skorað í fimm HM-endaspæl á rað.
Ronaldo skoraði fýra mál móti Føroyum í HM-undankappingini til HM-2018. Eitt á Tórsvølli og trý í Portugal. Á myndini ansar Sonni Ragnar Nattestad eftir portigisisku heimsstjørnuni á Tórsvølli 10 . oktobur 2016.
Eyðun Klakstein, landsliðsvenjari, hevur tikið hesar leikarar út til seinasta HM-undankappingardystin út móti Kroatia fríggjadagin tann 14. novembur og venjingardystin móti Kasakstan á útivølli týsdagin 18. novembur.
Málverjar
Verjuleikarar
Miðvallarleikarar
Álopsspælarar
Ólavur Mikkelsen hevur tikið úr U21-landsliðshópin út til EM-undankappingardystin á útivølli móti Fraklandi mánadagin 17. novembur og venjingardystin á útivølli móti Ungarn hósdagin 13. novembur
U21-landsliðið
Málverjar:
Rasmus Olsen, FC Suðuroy
Hans Jákup Arngrímsson, Víkingur
Verjuspælarar
Aron Reinert Hansen, B68 Toftir
Jákup Vilhelmsen, B68 Toftir
Jónas Prior, 07 Vestur
Ingi Arngrímsson, Víkingur
Virgar Jónsson, EB/Streymur
Marjus Nón, B68
Bjarti Thorleifsson, Skála ÍF
Torkil Úlvur Holm, TB Tvøroyri
Miðvallarspælarar
Jógvan Gullfoss, B36 Tórshavn
Mattias Hellisdal, Vesteras Svøríki
Árni Nóa Atlason, Víkingur
Dávid Biskopstø Andreasen, KÍ Klaksvík
Ejvind Restorff Mouritsen, HB Tórshavn
Heini Fossdalsá Sørensen, HB Tórshavn
Hanus Højgaard, B68 Toftir
Áki Samuelsen, Ranheim Fotball (Noreg)
Álopsspælarar
Djóni Samuelsen, B68
Thomas Bjørn Miezan, EB/Streymur
KÍ livdi upp leiklutin sumstórfavorittur at vinna finaluna um Løgmanssteypið móti Víkingi.
Víkingur helt stand meginpartin av fyrra hálvleiki. Men fyri steðgin legði Mads Boe Mikkelsen KÍ fram um.
Víkingur royndi at hótta KÍ í seinna hálvleiki, men bert hendinga ferð var bit í.
Í staðin var tað Páll Klettskarð, sum avgjørdi finaluna seint í dystinum.
Les alla dystarfrásøgnina
Fyrr í vikuni gjørdist greitt, at Fróði Benjaminsen ikki heldur fram sum venjari hjá B68, og nú boðar felagið frá, at Aleksandar Jovevic er nýggjur høvuðsvenjari hjá besta liðnum.
Aleksander hevur áður verið hjálparvenjari hjá B68 í 2018, 2020 og 2021. Hann var ein týðandi partur av toyminum, sum fekk felagið aftur í Betri Deildina.
Eisini hevur hann verið venjari í Betrideildini hjá ÍF í nøkrum umførum
Seinasta árið hevur hann roynt seg uttanlands í Barein, har hann hevði eitt spennandi starv hjá Ali CSC.
Eftir trý ár sum venjari hjá kvinnunum hjá NSÍ skal Allan Dybczak aftur venja bestu kvinnurnar hjá HB. Hann hevur gjørt trý ára sáttmála.
Við sær hevur hann Petur Meinhard Magnussen, sum verður málmansvenjari hjá kvinnunum.
Allan gevst í NSÍ eftir trý ár við góðum úrslitum. Hann kom til felagið í 2023, og longu sama ár vann NSÍ steypakappingina. Í 2024 eydnaðist tað eisini at vinna greipuna.
Allan var venjari í HB frá 2011 til 2021, fyri tað mesta hjá kvinnunum, men eisini hjá 1. deild monnum. Eitt skifti í 2021 var hann eisini skrivaður sum venjari hjá besta mansliðnum, tí Kevin Schindler ikki hevði pappírini upp á pláss.
Í 2012 spældi landsliðsleikarin, Viljormur Davidsen, tríggjar dystir fyri barndómsfelagið NSÍ. Í seinasta dystinum fekk hann reytt kort móti grannunum, B68.
Nú trettan ár seinni skiftir Viljormur ikki heilt óvæntað aftur til NSÍ, og hevur skrivað undir trý ára sáttmála við felagið.
Viljormur flutti til Danmarkar bert 15 ára gamal. Har spældi hann við ungdómsliðnum hjá OB, og seinni umboðaði hann feløgini FC Fyn, FC Fredericia og Vejle Boldklub.
Síðan 2023 hevur hann spælt við HB, har hann eisini var liðskipari.
NSÍ skrivar, at tey gleðast um at síggja Viljorm aftur í gulu blusuni, og ynskja honum hjartaliga vælkomnan heim.
Atli Gregersen spældi í gjár sín seinasta dyst á besta liðnum hjá Víkingi í Sarpugerði, tá ið Víkingur tapti 2-0 fyri HB.
Fyri Víking hevði dysturin einki at siga, uttan at halda leikararnar í gongd til steypafinaluna fríggjakvøldið klokkan 19.00 móti KÍ.
Fyri HB merkti sigurin, at teir hava tryggja sær annað plássið, eftir eina sera vánaliga byrjan upp á kappingarárið. HB hevur ongan dyst tapt í landskappingini, síðan André Olsen tók yvir sum venjari eftir Adolfo Sormani.
Tað var sum heild meira bit í HB millum hvirlurnar í Sarpugerði, og vindurin gjørdi at ein sending inn um Víkingaverjuna steðgaði á, so at málverjin, Bárður á Reynatrøð, ikki náddi bóltinum, og so skoraði Emil Grønn Pedersen sítt mál nummar 20 í landskappingini.
Í hálvleikinum skifti Víkingur nógv út fyri at spara leikarar til steypafinaluna, og miðskeiðis í seinna hálvleiki, var Atli Gregersen skiftur út fyri seinastu ferð í Sarpugerði, og lógvabrestirnir rungaðu millum hvirlurnar.
HB var framhaldandi omaná, og seint í dystinum avgjørdi Ási Dam við einum frálíkum langskoti eftir jørð.
(Trýst á myndirnar fyri at gera tær størri)
Føroyameistararnir KÍ vunnu 4-2 á NSÍ í seinasta umfarið í Betrideildini leygardagin. Harvið fóra suverena KÍ ósigra gjøgnum landskappingina 2025.
NSÍ, sum tíðliga í kappingarárinum líktist einum kappingarneyta hjá KÍ um føroyameistaraheitið, mátti í dag vinna móti KÍ, um teir skuldu hava nakra vón at fara fram um HB á øðrum plássinum.
KÍ gjørdi skjótt av og førdi 2-0 eftir eitt stórt korter. Rene Shaki Joensen og Jákup Andreassen skoraðu málini.
Aron Knudsen minkaði til 2-1 tíggju minuttir fyri steðgin, men beint fyri hálvleik gjørdi Filip Brattbakk tað til 3-1, og tíggju minuttir inn í seinna hálvleik skoraði hann til 4-1.
Daniel Obbekjær minkaði til 4-2 mitt í seinna hálvleiki, men nærri kom NSÍ ikki, og KÍ vann harvið allar tríggjar dystirnar móti NSÍ hetta kappingarárið.
KÍ skal fríggjkvøldið klokkan 19.00 royna at vinna greipuna, tá ið teir spæla finaluna um Løgmanssteypið móti Víkingi á Tórsvølli.
Hjartaliga til lukku við meistaraheitinum KÍ.
1. deildar liðið hjá KÍ má tað tungu leið niður í 2. deild. Tað gjørdist greitt, tá ið avgerandi dystirnir um niðurflyting vóru spældir í seinasta umfari í 1. deild í kvøld.
KÍ gjørdi tað, teir kundu og vunnu 1-0 móti 07 Vestur í Klaksvík. Dávid Biskopstø Andreasen skoraði málið.
Men ólukktíð fyri KÍ, so megnaðu teir næstbestu hjá EB/Streymi, at venda 0-1 til 3-1 sigur móti B36 í Gundadali.
Tórur Eið Eliasen legði B36 fram um beint fyri hálvleik. Men eitt korter inn í seinna hálvleik javnaði Niels Pauli Danielsen við brotssparkið, nakrar minuttir seinni legði hann EB/Streym fram um 2-1, og fyri tað ikki skal vera lygn so gjørdi hann tað til 3-1 átta minuttir fyri tíð.
Harvið fór EB/Streymur upp á 7. plássið við 28 stigum, meðan KÍ var liggjandi á 9. plássinum við 26 stigum og flytur niður í 2. deild komandi ár.
07 Vestur flytur eisini niður í 2. deild.
Nottingham Forest í ensku Premier League hevur sett Sean Dyche sum venjara fram til summarið 2027.
Dyche, sum er triðji venjarin hjá Nottingham hetta kappingarárið, tekur yvir eftir Ange Postecoglou, sum varð koyrdur beint eftir ósigurin fyri Chelsea leygardagin eftir bert átta dystir.
Tíðliga í kappingarárinum valdi litríki grikska eigarin Evangelos Marinakis at senda væl umtókta Nuno Espirito Santo til hús, hóast hann seinasta kappingarár førdi Forest til Evropeiskan fótbólt fyri fyrstu fer í mong ár.
Forest liggur í løtuni á 18. plássi í Premier League. Fyrsti dysturin hjá Dyche verður hóskvøldi móti FC Porto í Europa League.
Dyche er 54 ára gamal og hevur verið arbeiðsleysur síðan januar, tá hann varð koyrdur úr Everton.
Graham Potter er nýggjurlandsliðsvenjari ella “förbundskapten” hjá Svøríki.
50 ára gamli eingislmaðurin avloysir danska Jon Dahl Tomasson, sum varð koyrdur eftir bert eitt stig í fýra dystum í HM-kappingini.
Hann skal royna at fáa Svøríki til HM næsta summar, hóast tað sær rættiliga ómøguligt úrt Avtalan fevnir um komandi dystir móti Sveits og Slovenia í novembur, og møguligt playoff í mars.
Potter hevur áður verið venjari í Svøríki. Hann førdi Östersund frá fjórðbestu deildini upp í Allsvenskan, og vann í 2017 svensku steypakappingina.
Góðu avrikini førdu hann til Brighton og víðari til Chelsea. Har gekst ikki so væl, og heldur ikki West Ham fekk hann tað at rigga.
Vit kenna søguna um B71, Herfølge og Leicester, sum heilt óvæntað gjørdust meistarar, og nú hevur lítla svenska felagnið Mjällby eisini skriva seg inn í hendan partin av fótbóltssøguni.
Við 2–0 sigri á IFK Göteborg tryggjaði Mjällby sær svenska meistaraheitið, heili trý umfør áðrenn kappingin endar.
Hällevik, har felagið heldur til, er ein lítil fiskibygd við umleið 1000 fólkum. Økið hoyrir til Sölvesborg kommunu í Blekinge í Suður-Svøríki, har umleið 17.000 fólk búgva.
BBC kallar hetta “eitt av størstu sjokkunum í nútímans evropeiskum fótbólti”.
Mjällby var í 2016 nær við at fara á húsagang og spældi tá í fjórbestu deildini. Men í 2018 og 2019 flutti felagið upp tvær ferðir á rað.
Nú eru teir meistarar fyri fyrstu ferð í søguni.
AIK við føroyska Mikkjal Thomassen er nummar fimm í bestu svensku deildini.
Víkingur tryggjaði sær í dag fjórað plássið í Betrideildin við einum tryggum 4-0 sigri móti FC Suðuroya í Vági.
Hunter Boaz Bell hjá FC Suðuroy var óheppin beinanvegin í dystinum at beina bóltin í egið mál, og Olaf Bárðarson økti fyri steðgin.
Í seinna hálvleiki skoraðu Jørgen Nielsen og Arnbjørn Svensson til úrslitið 4-0.
Hóast B36 eisini vann í dag, so er Víkingur fimm stig framma fyri, og við einum dysti eftir, hevur liðið frá Eysturkommuna harvið tryggja sær pláss í Evropa næsta ár.
Leygarkvøldið 31. oktobur spælir Víkingur steypafinalu móti KÍ á Tórsvølli.
Fyri aðru ferð hetta kappingarárið sendir Nottingham Forest venjaran til hús og fyri aðru ferð í 2025 verður Ange Postecoglou koyrdur sum venjari í Premier League.
Ange, sum var koyrdur í Tottenham eftir seinasta kappingarár, tók yvir hjá Nottingham Forest í septembur, tá ið vælumtóki venjarin Nuno Espirito Santo varð loystur úr starvinum eftir ósemju við grikska eigaran Evangelos Marinakis.
Men eftir átta dystir og 39 dagar uttan sigur, tveir javnleikir og seks ósigrar, verður Ange longu sendur til hús.
Seinasta dysturin, 0-3 móti Chelsea á heimavølli í fyrr í dag gjørdist dropin. Viðhaldsfólkini fóru heim áðrenn dysturin var liðugur, og felagið boðaði frá uppsøgnini beint eftir dystin.
Talan er um ringastu byrjan hjá einum venjara í føstum starvi í 100 ár. Bara ein venjari hevur sitið styttri Nú verða Marco Silva og Sean Dyche nevndir sum møguligar avloysarar.
Fjepparar hjá ísraelska felagnum Maccabi Tel Aviv kunnu verða noktaðir atgongd til dystin móti Aston Villa í Birmingham 6. novembur. Trygdarmyndugleikar í Onglandi meta støðuna millum Ísrael og Palestina vera ov vandamikla.
Bretska stjórnin hevur nú blandað seg í málið og arbeiðir saman við politinum fyri at tryggja, at allir fjepparar sleppa inn. Fleiri ráðharrar hava sagt, at avgerðin ikki kann góðtakast.
Stjórin í Maccabi Tel Aviv, Jack Angelidis, sigur seg vera stúrnan um, hvat hetta merkir, og setir spurnartekin við, um tað kann vera eitt tekin um antisemittismu.
UEFA heitir á partarnar um at finna trygdarloysnir, so dysturin kann spælast í tryggum umstøðum.
NSÍ boðar frá, at Klæmint Olsen framhaldandi verður partur av felagnum í 2026. Í løtuni er hann toppskjútti í Betrideildini við 26 málum, og hevur sostatt ein gyltan møguleika at javna og taka málmetið hjá Mikkel Dahl, sum skoraði 27 mál í 2021.
Klæmint hevur altíð spælt við NSÍ uttan eitt ár við Breiðablik í bestu íslendsku deildini í 2023.
Klæmint Olsen er eisini samlaður toppskjúti í bestu deildini gjøgnum tíðirnar við 265 mál fyri 424. Hann var toppskjútti i 2013, 2014, 2015, 2016, 2019 og 2020
Hann hevur eisini málmetið á landsliðnum á 10 mál saman við Rógva Jacobsen.
Kelda: FaroeSoccer
Um tit ikki vita, hvat tit skulu geva føroyska fótbóltsfjepparanum í jólagávu, so er endurminningarnar hjá okkara størstu fótbóltsstjørnu nakrantíð, Toda Jónsson, eitt gott boð.
Heimasíðan torsgota.fo skrivar, at bókin Todi verður løgd fram, í Perluni í Havn hóskvøldið 6. novembur.
Hetta er søgan um eina yrkisleið frá 1989 til 2009. Ein drongur úr Føroyum, sum fór einsamallur til Danmarkar í 1993 við einum dreymi um at gerast fótbóltsspælari, og tað eydnaðist.
Todi var toppskorari á landsliðnum, spældi í FC København, vann fleiri meistaraheitir. Men hetta er eisini søgan um sálarligt trýst, óvissa, skuffilsi og boðini: “Vit hava ikki tørv á tær meira.”
Sólvit Nolsø leggur fram. Leivur Frederiksen hevur samrøðu við høvundan. Erla Bech Nolsø syngur.
HB boðar frá, at Lukasz Cieslewicz skal vera hjálparvenjari hjá besta mansliðnum í felagnum. Samstundis verður hann eisini høvuðsvenjari hjá 1. deild við monnum.
Við at samantvinna bæði størvini, sigur HB, at yvirgongdin frá 1. deild til Betrideildina verður smidligari.
Lukasz Cieslewicz hevur verið høvuðsvenjari hjá HB-kvinnunum seinastu trý árini. Kvinnurnar hjá HB gjørdust steypavinnarar í ár.
Lukasz spældi sambært FaroeSoccer 255 dystir í bestu deildini, nógv teir flestu við B36. Hann skoraði 84 mál.
Hann var millum bestu mest týðandi leikarar føroysku kappingini í fleiri ár og gjørdist føroysmeistari við B36 í 2011, 2014 og 2015.
Mynd: Rói Sørensen / HB
Cristiano Ronaldo hevur aftur skrivað søgu.
Týsdagin skoraði hann bæði málini í 2-2 dystinum móti Ungarn í HM-kappingini.
Við hesum gjørdist hann mest skorandi spælarin nakrantíð í HM-undankappingini. Ronaldo hevur nú skorað 41 mál í 50 HM-undandystum.
Fýra av hesum málum komu móti Føroyum í HM-undankappingini til HM-2018. Eitt á Tórsvølli og trý í Portugal. Á myndini ansar Sonni Ragnar Nattestad eftir portigisisku heimsstjørnuni á Tórsvølli 10 . oktobur 2016.
Í alt hevur hann skorað 143 mál í 225 landsdystum, og tað er eisini met fyri flest landsliðsmál.
Kekkiski venjarin, Ivan Hasek, yvirlivdi ikki 2-1 tapið móti Føroyum.
Idnes.cz skrivar, at fótbóltssambandið í Kekkia hevur nú sagt Hasek úr starvi. Hann vann bert 11 av 21 dystum, og megnaði ikki at vinna á liðum omanfyri Kekkia á styrkilistanum.
Dagin eftir bað landsliðslegendan og ítróttarstjórin hjá Kekkia Pavel Nedved um almenna umbering fyri kekkiska avrikið.
Eisini 5-1 tapið móti Kroatia í summar var svárt.
Starvsnevndin hevði kreppufund á flogvøllinum í Vágum, meðan kekkar vóru strandaðir í Føroyum av mjørka.
Ein fyribilsvenjari skal taka yvir til dystin móti Gibraltar í novembur. Pavel Nedved hevur fingið fulla heimild at velja nýggjan venjara, sum skal skriva undir fýra ára sáttmála.
Á myndini heilsar liðformaðurin á U21-landsliðnum, Áki Samuelsen, upp á dómarar og liðformann hjá Sveis undan kvøldsins dysti á Tórsvølli.
Hetta var sambært FaroeSoccer nítjandi U21-landsdystur hjá Áka, sum harvið tekur metið frá Steffan Radosavljevic, Jóannes Bjartalíð og Lukas Giesing, sum sambært FaroeSoccer hava spælt átjan U21-landsdystir.
Áki hevur skotið tvey mál fyri U21-landsliðið.
Tað er stórur møguleiki er fyri, at Áki fer at bøta um metið, tí U21-landsliðið skal spæla fimm dystir afturat í hesi EM-undankappingini. Næsti dystur er í Fraklandi 17. novembur.
U21 – EM-undandystur á Tórsvølli
Føroyar – Sveis 1-3 (0-1)
Annan dystin á rað taptu okkara U21-,menn í fótbólti. Hesaferð var tað Sveis, sum vann 3-1 á Tórsvølli.
Ikki tað, Føroyar vóru væl við leikliga, og kláraðu sum heild væl at halda Sveis frá at skapa vandamiklar støður. Sveis var als ikki á sama støði sum sera góða franska U21-landsliðið, sum vitjaði í Klaksvík hósdagin.
Sveis kom fram um í fyrra hálvleiki. Jóhan Josephsen javnaði fyri Føroyar eitt korter fyri tíð. Men føroyska liðið var ikki nóg hugsavnað beint eftir málið, og Sveis kom fram um aftur í fyrsta álopið eftir okkara mál.
Seinasta málið kom, tá ið Hans Jákup Armgrimsson fyrst bjargaði brotsskarki, men retururin fór í málið.
Les alla dystarfrásøgnina
Svenska fótbóltssambandið boðar í dag frá, at landsliðsvenjarin Jon Dahl Tomasson er sagdur úr starvi.
Danin varð settur í starv 2024, men tapið 0-1 móti Kosovo mánadagin gjørdist hansara síðsta dystur.
Fótbóltssambandið sigur, at bert eitt stig í fýra dystum í HM-kappingini er ov lítið. Tí verður nú leita eftir nýggjum venjara.
Ein sum longu hevur bjóðað seg fram til starvið, er enski Graham Potter, sum herfyri var koyrdur í West Ham. Hann hevur áður verið venjari hjá Östersunds í Svøríki, og er beint nú í húsinum, sum hann framvegis eigur í Svøríki
Klokkan seks í kvøld spælir U21-manslandsliðið í fótbólti EM-undandyst á Tórsvølli móti Sveis.
Eftir tríggjar sigrar, taptu okkara menn 6-0 móti Fraklandi í Klaksvík fríggjakvøldið.
Nú skal U21-landsliðið reisa seg aftur og megna teir at fáa úrslit móti Sveis, serliga ein sigur, so er av álvara vón um náa øðrum plássinum, sum gevur atgongd til avgerandi røkk ella støkk dystir.
Við fsf.fo sigur venjarin, Ólavur Mikkelsen, at lykilin er hart arbeiði og gott verjuspæl. Hann metir Sveis sum næststerkasta liðið í bólkinum.
Stigatalva og myndir frá venjing
Grannar okkara fyri norðan, Ísland spældu seg í gjár til eitt gott úrslit móti Frakland við øllum heimsstjørnunum
Á heimavøllinum í Reykjavík spældi Ísland javnt 2-2 móti næstbesta landinum í heiminum
Við úrslitinum livir íslendska vónin um HM framvegis undan teimum seinastu tveimum umførunum í HM-undankappingini.
Ísland spælir í novembur á útivølli móti Aserbadjan og Ukraina.
| D | V | J | T | Mál | +/- | Stig | ||
|---|---|---|---|---|---|---|---|---|
| 1 | Frakland | 4 | 3 | 1 | 0 | 9–3 | +6 | 10 |
| 2 | Ukraina | 4 | 2 | 1 | 1 | 8–7 | +1 | 7 |
| 3 | Ísland | 4 | 1 | 1 | 2 | 11–9 | +2 | 4 |
| 4 | Aserbadjan | 4 | 0 | 1 | 3 | 2–13 | -11 | 1 |
Í morgun er kreppufundur í svenska fótbóltssambandinum, eftir at svenska fótbóltslandsliðið tapti í gjárkvøldið 1-0 móti Kosovo á heimavølli.
Harvið hevur Svøríki bara fingið eitt stig í fýra dystum í HM-undankappingini. Tað ger, at tað bara er ein evarska lítil teoretiskur møguleiki fyri, at Svøríki kann spæla seg til HM.
Svenskir miðlar og viðmerkjarar er sjálvandi ikki blíðir eftir vánaligu úrstlini, og er samd um, at tíðin hjá landsliðsvenjaranum, dananum Jon Dahl Tomasson, er farin og vilja hava hann koyrdan frá.
| D | V | J | T | Mál | +/- | Stig | ||
|---|---|---|---|---|---|---|---|---|
| 1 | Sveis | 4 | 3 | 1 | 0 | 9–0 | +9 | 10 |
| 2 | Kosovo | 4 | 2 | 1 | 1 | 3–4 | -1 | 7 |
| 3 | Slovenia | 4 | 0 | 3 | 1 | 2–5 | -3 | 3 |
| 4 | Svøríki | 4 | 0 | 1 | 3 | 2–7 | -5 | 1 |
TB boðar í kvøld frá, at felagið hevur longt sáttmálan við høvuðsvenjaran Thomas Thinggaard fram til og við 2027.
Thomas kom til TB fyri summarfrítíðina. Hann hevur áður verið venjari hjá U17-landsliðnum og fótbóltsmennari hjá Fótbóltssambandinum.
TB flutti upp í bestu deildina í ár, men hevur havt trupult við at fáa úrslit. Felagið liggur niðast, og tað skal nógv til, um felagið skal bjarga sær.
Formaðurin André Dalfoss sigur, at Thomas hevur fingið ró á felagið og er perfektur til TB. Ungir leikarar hava spælt nógv, og øll í felagnum eru sera væl nøgd við hansara arbeiði.
Oyggjalandið, Kabo Verdi, ella Grønhøvdaoyggjar, sum tað plagdi at eita á føroyskum, hevur spælt seg til HM-endaspælið.
Oyggjalandi við 600.000 íbúgvum, sum liggur í Atlantshavinum út fyri Afrika, vann bólk D í afrikansku HM-undankappingini eftir 3–0 sigur móti Eswatini.
Hetta er fyrstu ferð í søguni, at Kabo Verdi spælir seg til HM-endaspælið.
Kabo Verdi verður næstminsta landið nakrantíð í einum HM-endaspæli. Bara Ísland hevur verið minni.
Í hópinum eru leikarar føddir í millum annað Niðurlondum, Portugal og Fraklandi.
Kabo Verdi er fyrrverandi koloni hjá Portugal, og gjørdist sjálvstøðugt í 1975.
Kendasti fótbóltsleikarin nakrantíð frá Kabo Verdi, er Nani, sum spældi við Manchester United og fyri portugisiska landsliðið.
Hóast Atli Gregersen í “Fótbóltspráti” útvarpinum heitti á føroyingar at brúka føroyskar miðlar, er tað altíð áhugavert at síggja, hvat útlendskir miðlar siga.
Beinanvegin eftir 2–1 sigurin hjá Føroyum á Kekkia á Tórsvølli kom ein greið og harðorðað viðmerking frá fyrrverandi kekkiska stórleikaranum og Ballon d’or vinnaranum, Pavel Nedved. Hann segði, at ósigurin og leikgongdin í einum so týdningarmiklum dysti ikki kann góðtakast. Hann bað viðhaldsfólkini um umbering og staðfesti, at orka, skipan og stríðsvilji manglaðu.
Nedved kom aftur í kekkiskan fótbólt í juni og hevur nú ábyrgdina av bæði A- og U21-landsliðnum, sum eitt slag av stjóra fyri landsliðsmenningini í Kekkia. Hann kann til dømis mæla til, at venjarin Ivan Hasek verður loystur úr starvi, og kekkiskir miðlar halda, at tað kann henda. Nedved segði: “Vit fara at meta um støðuna, tá vit eru afturkomnir til Kekkia.”
Kekkiskir miðlar eru beiskir. iSport/Blesk kallar tapið “Skandala á Føroyum” og spyr, um Hasek eigur at fara frá. Lesarar krevja eisini broytingar og ivast í, um liðið er klárt til HM.
iDNES.cz endurgevur Hasek, sum viðgongur, at okkurt ikki virkaði. Teir leggja dent á, at Kekkia, sum hevði bóltin, men ikki neyvleikan. Føroyar vóru væl skipaðar og tóku av, tá møguleikin beyð seg.
Sport.cz skrivar, at ein fjórðingstími í seinna hálvleiki avgjørdi dystin. Teir rósa Føroyum fyri taktiskan neyvleika og stríðsvilja.
Tapið hevur skakað kekkiska fótbóltin, og Føroyar fáa rós fyri ein væl fyrireikaðan og søguligan sigur, sum hevur vakt ans kring Evropa.
HM-undandystur, bólkur L, á Tórsvølli kl. 17.00
Føroyar – Kekkia 2-1 (0-0)
Hósdagin spældu vit ein tann besta landsdystin nakrantíð móti Montenegro, og í dag spældu vit upp aftur betri móti Kekkia.
Okkara menn spældu upp móti einum sera góðum kekkiskum lansliðið, og hóast talan var um ein javnan dyst, so ber væl til at siga, at 2-1 sigurin var í lagi.
Sjáldan um ikki ongantíð hava vit sæð føroyska manslandsliðið í fótbólti spæla so væl sum hesar báðar dystirnar. Landsliðið hevur fingið veruligt flog, og nú ræður um at halda flogið.
Føroyska venjaraloysnin hevur gjørt undurverk
Les meira
HM-undandystur, bólkur L, á Tórsvølli kl. 17.00
Føroyar – Kekkia
Føroyar spæla ímóti Kekkia á Tórsvølli í dag klokkan 17.00 í HM-undandysti í bólki L.
Kekkia er nummar tvey í bókinum við 13 stigum, javnir í stigum við Kroatia á fremsta plássi.
Føroyar eru eftir frálíka stórsigurin móti Montenegro á triðja plássi við 9 stigum. So skuldu okkara megna tað heilt óvæntaða at vunnið móti Kekkia í dag, so verða vit bara eitt stig aftanfyri teir.
Nú ræður fyrst og fremst um at fáa armarnar niður og so at fara hugsavnaðir á vøllin at stríðast av fullum huga.
Les meira
HM-undandystur, bólkur L, á Tórsvølli kl. 19.45
Føroyar – Montenegro 4-0 (2-0)
Føroyar vunnu í kvøld tann størsta sigurin nakrantíð, tá ið Montenegro varð sent av landinum aftur við einum 4-0 ósigri.
Fyrri hálvleikur var leikliga rímiliga javnur fyrstu løtuna. Men Føroyar vóru vandamiklari, og tá ið eitt korter var spælt legði Hanus Sørensen Føroyar fram um.
Tíggju minuttir fyri hálvleik øktu Føroyar, tá ið Árni Frederiksberg sendi eitt fríspark innfyri, og bólturin endaði í málinum umvegis ein montenegra ella Meinhard Olsen.
Í seinna hálvleiki høvdu Føroyar fullkomiliga stýr á dystinum, og tað vóru ikki meira tíggju spældir, tá ið Árni Frederiksberg legði upp til sítt tríðja mál, tá ið Hanus Sørensen skallaði eitt frálíkt innlegg í málið.
Árni Frederiksberg setti sjálvur krúnina á verkið, tá ið hann miðskeiðis í seinna hálvleiki sendi eitt brotsspark í málið.
Dysturin og filmssamandráttur á heimasíðuni hjá UEFA
Les dystarfrásøgnina her
Eyðun Klakstein, landsliðsvenjari, hevur valt hesar ellivu at byrja á vøllinum móti Montenegro á Tórsvølli í kvøld:
Mattias H. Lamhauge – Jóannes K. Danielsen, Odmar Færø, Gunnar Vatnhamar, Andrias Edmundsson, Martin Agnarsson – Árni Frederiksberg, Brandur Hendriksson, Jákup B. Andreasen, Hanus Sørensen – Meinhard E. Olsen
Á beinkinum:
Bárður á Reynatrøð (má), Bjarti Mørk (má), Viljormur Davidsen, Jann Julin Benjaminsen, Arnbjørn Svensson, Hallur Hansson, Geza David Turi, Adrian Justinussen, Jóannes Bjartalíð, Páll Andrasson Klettskarð, Jóan Símun Edmundsson, Petur Knudsen.
Kringvarpið sjónvarpar dystin, og FM1 útvarpar dystin.
HM-undandystur, bólkur L, á Tórsvølli kl. 19.45
Føroyar – Montenegro
Í kvøld klokkan 19.45 taka Føroyar móti Montenegro á Tórsvølli. Bæði liðini hava seks stig eftir fimm dystir í HM-undanbólki L, og tí er talan um beinleiðis stríð um triðja plássið.
Tá ið londini spældu í Podgorica í mars, sá út til at enda 0-0. Men í 95. minutti skoraði Montenegro og vann 1-0. Tað var fyrstu ferð, at A-landsliðini hjá londunum møttust. Føroyar hava sostatt nakað at hevna á heimavølli.
Les alt um dystin
Stjørnuáleyparin hjá ensku meistarunum Liverpool, Mohamed Salah, hevur havt ein sera vánaliga byrjan upp á kappingarárið í Liverpool.
Men í kvøld skoraði hann tvey mál, tá ið Egyptaland spældi seg til HM-endaspælið í fótbólti við einum greiðum 3-0 sigri á Djibouti.
Ibrahim Adel legði Egyptaland á odda, áðrenn Salah skoraði annað og triðja málið.
Við sigrinum hevur Egyptaland nú 23 stig og liggur fremst í bólkinum.
Bara ein dystur er eftir, og Burkina Faso, sum liggur fimm stig aftanfyri, kann ikki longur náa Egyptaland.
Egyptaland hevur áður verið við í HM tríggjar ferðir. Seinast var í 2018, tá teir fóru heim úr Russlandi uttan stig.
U17-dreingirnir í fótbólti taptu greitt móti Eysturríki í fyrsta dystinum í EM-undanbólki 6. Dysturin endaði við 5-1 sigri til Eysturríki.
Eysturríki førdi 1-0 í steðginum og kom fram um 3-0, áðrenn Dennis Anghel minkaði um munin til 3-1.
Dennis Anghel er, sum navnið eisini bendir á, sonur Sorin Anghel, sum var týðandi leikari í bestu føroysku deildin í nógv ár.
Eysturríki skoraði tvey mál afturat til úrslitið 5-1.
Christian Høgni Jacobsen hevur 18 spælarar við til kappingina. Fýra av teimum spæla í donskum feløgum.
Dysturin á heimasíðuni hjá UEFA
Dystaskráin
11. okt. Írland – Føroyar (Lindabrunn) kl. 11.00
14. okt. Føroyar – Kosovo (Lindabrunn) kl. 14.00
Tveir toftamenn vóru venjarar hjá hvør sínum liði í Gundadali í kvøld, tá ið HB tók móti B68. André Olsen og Fróði Benjaminsen.
Undan dystinum hevði hvørgin venjarin tapt í Betrideildini higartil, Fróði gott nokk bara tveir dystir.
Eftir dystin var bara André ósigraður, tí HB vann greitt 5-1, og var betri í øllum lutum í spælinum.
Tað var tó B68, sum loypti hvøkk á HB, tá ið Djóni Samuelsen skoraði móti sínum barndómsfelagi tíðliga í dystinum.
Dan í Soylu janvaði fyri steðgin, og í seinna hálvleiki orkaðu toftamenn ikki at standa í móti meira. Emil Grønn Pedersen, Sammy Skytte, Dan í Soyli einaferð afturat og Bartal Páll Klein skoraðu málini.
NSÍ vann eisini í kvøld, og tí er HB enn á triðja plássinum. B68 liggur trygt mitt á stigatalvuni og hava bara æruni at spæla fyri.
Samandráttir frá 25. umfarið frá Televarpinum
(Skermmynd: Televarpið)
KÍ er føroyameistari 2026. Tað gjørdist greitt, tá ið teir í kvøld vunnu 2-1 móti 07 Vestri í Sørvági.
Tað tók góða løtu áðrenn KÍ kom fram um. Men beint eftir hálvleiki, legði Árni Frederiksberg KÍ fram um, tá ið hann setti eitt flætt innlegg frá Filip Brattbakk í málið.
07 Vestur javnaði tíggju minuttir seinni. Tað var Casper Gedsted Hansen, sum skoraði.
KÍ átti tó seinasta orðið í dystinum, og tað var við tí vanligu KÍ-uppskriftini. Árni Frederiksberg til Pàll Klettskarð, og so var KÍ á meistarakós.
Páll Klettskarð náddi at fáa reytt kort fimm minuttir fyri tíð, men fleiri mál komu ikki.
KI er føroyameistari 2025, hóast tvey umfør eru eftir.
Hjartaliga til lukkku KÍ.
Landsliðsleikarin, Adrian Justinussen, skiftir til AC Horsens 1. januar, tá sáttmálin við Hillerød gongur út.
Føroyski álopsleikarin hevur gjørt vart við seg í Danmark seinastu tjúgu mánaðirnar, har hann hevur skorað 31 mál og lagt upp til sjey í 58 dystum fyri Hillerød.
Tí hevur AC Horsens, sum er fíggjarliga sterkari enn Hillerød, gjørt tvey og eitt hálvt-ára sáttmála við Justinussen.
Adrian hevur longu víst sítt virði í deildini. Hann skoraði tvey mál júst móti júst Horsens síðsta vikuskifti.
Sáttmálin er galdandi til summarið 2028.
HB boðar í dag frá, at felagið hevur longt sáttmálan við André Olsen við tveimum árum fram til og við 2027.
André Olsen tók við í HB eftir eina sera vánaliga byrjan upp á kappingarárið undir Adolfo Sormani. Síðan tá hevur HB ongan dyst tapt í landskappingini, og einasti ósigurin var móti Brøndby í Conference League.
U19-dreingirnir hjá Víkingi megnaði í kvøld at skriva føroyska fótbóltssøgu við at spæla seg víðari í UEFA Youth League.
Teir vunnu 4-1 á Narva Trans úr Estlandi á Tórsvølli. Fyrri dysturin endaði 1-0 til Narva,
Dávid á Líðarenda legði Víking á odda undan steðginum. Arnór Brandsson brendi brotsspark, men fekk beint bóltin í málið. Jacob Bacalso økti til 3-0. Estiska liðið minkaði um munin, men Bogi á Reynatrøð punkteraði spenningin við 4-1 málinum.
Næsti dystur er móti Genk í Belgia 22. oktober. Heimadystur verður 5. november.
B68 boðar frá, at Djóni Samuelsen heldur fram í B68 komandi kappingarár.
18 ára gamli Djóni Samuelsen kom úr HB til B68 undan hesum kappingarárinum. Hann hevur sambært FaroeSoccer skotið 2 mál í 21 dystum fyri toftamenn.
Áki er beiggi U21-landsliðsleikaran, Áka Samuelsen.
Áki Samuelsen javnaði til 1-1 við brotssparki beint fyri hálvleik, tá ið Ranheim vann 2-1 á útivølli móti Raufoss í næstbestu norsku deildini.
Hóast Famara Camara hjá Ranheim fekk reytt kort um miðjan seinna hálvleiki, eydnaðist Mikael Tørset Johnsen at skora sigursmálið fýra minuttir fyri tíð.
Ranheim er nummar seks við 38 stigum, men tað eru bara trý stig upp til Start á øðrum plássið, nú seks dystir mangla. So kappingini um uppflyting er hørð millum.
Áki hevur skotið sjey mál hetta kappingarárið.
Eyðun Klakstein, landsliðsvenjari, hevur tikið hesar leikarar út til heimadystirnar móti Montenegro hósdagin 9. oktobur, og móti Kekkia sunnudagin 12. oktobur.
Málverjar
Verjuleikarar
Miðvallarleikarar
Álopsspælarar
Ólavur Mikkelsen hevur tikið úr U21-landsliðshópin út til heimadystirnar móti Fraklandi í Klaksvík fríggjadagin 10. oktobur og móti Sveis á Tórsvølli týsdagin 14. oktobur.
U21-landsliðið
Málverjar:
Rasmus Olsen, FC Suðuroy
Hans Jákup Arngrímsson, Víkingur
Verjuspælarar
Aron Reinert Hansen, B68 Toftir
Jákup Vilhelmsen, B68 Toftir
Jónas Prior, 07 Vestur
Ingi Arngrímsson, Víkingur
Virgar Jónsson, EB/Streymur
Bjarti Thorleifsson, Skála ÍF
Torkil Holm, TB Tvøroyri
Miðvallarspælarar
Jógvan Gullfoss, B36 Tórshavn
Mattias Hellisdal, B36 Tórshavn
Árni Nóa Atlason, Víkingur
Dávid Biskopstø Andreasen, KÍ Klaksvík
Ejvind Restorff Mouritsen, HB Tórshavn
Heini Fossdalsá Sørensen, HB Tórshavn
Hanus Højgaard, B68 Toftir
Áki Samuelsen, Ranheim Fotball (Noreg)
Álopsspælarar
Jóhan Josephsen, B68 Toftir
Aron Benjaminsen, Kristiansund BK (Noreg)
Dávid Reynheim, Torino (ITA)
Nuno Espírito Santo er settur sum venjari hjá West Ham, eftir at Graham Potter var sendur til hús í vikuskiftinum.
Sjálvur var Nuno Espírito Santo uppsagdur í Nottingham Forest fyrr í mánaðinum, hóast hann seinasta kappingarár leiddi Forest til evropeiskan fótbólt fyri fyrstu ferð í 30 ár.
Portugisin hevur áður vant Wolves og Tottenham í Premier League. Eisini hevur hann vant Porto og Valencia.
Nakrar minuttir fyri tíð javanði Daniel Johansen til 3-3, tá ið KÍ vitjaði B68 á Svangaskarði í gjár. Harvið tryggjaði hann oddaliðnum eitt stig, sum ger, at teir kunnu tryggja sær meistaraheitið, um teir vinna móti 07 Vestur í Sørvági næsta leygardag.
Tað sá annars stóran part av dystinum út til, at B68 fór at gerast fyrsta liðið at vinna móti KÍ hetta kappingarárið.
Jóhan Josephsen legði B68 á odda longu í triðja minutti. Tíggju minuttir seinni økti Marjus Nón til 2-0 við frísparki, eftir at Gaston Nicolas Tellechea hjá KÍ fekk reytt kort.
Beint eftir hálvleik fekk Fríði Petersen hjá B68 beinleiðis reytt kort, og nakrar minuttir seinni høvdu Hallur Hansson og Filip Brattbakk minka um munin og javna til 2-2.
Jóhan Josephsen legði B68 á odda aftur, tá ið 20 minuttir vóru eftir. Men, sum nevnt, átti Daniel Johansen seinasta orðið í dystinum.
B68 kappast við EB/Streym um sætta plássið. Bæði liðini hava 24 stig.