Nýggi franski áleyparin hjá Liverpool, Hugo Ekiteke, ognaði sær eitt av teimum heilt býttu reyðu kortunum, tá ið hann fegnaðist um 2-1-sigursmálið móti Southampton við at lata seg úr troyggjuni og harvið fáa sítt annað gula kort..

Tað hendi fimm minuttir áðrenn dysturin tí lítlu ensku steypakappingini, EFL-Cuð var liðugur.

Liverpoolvenjarin, Arne Slot, var alt annað enn nøgdur: – Hatta var býtt og á ongan hátt klókt, segði hann við Sky Sports.

Slot helt, at franski áleyparin heldur átti at havt takkað Federico Chiesa fyri góða uppleggið.

Fyrra gulu kortið fekk Ekiteke fyri at sparka bóltin burtur í frustratión.

Ekiteke er leikbannaður til dystin í Premier League móti Crystal Palace leygardagin.

Svenska fótbóltssambandið hevur meldað fleiri hatursboð móti landsliðsvenjaranum, Jon Dahl Tomasson, eftir at Svøríki tapti móti Kosovo í HM-kappingini.

Á sosialu miðlunum, serliga á Instagram, hava fólk skrivað grov boð. Tomasson kallar tað fyri munnligan harðskap og sigur, at hann heldur, at tað er Eg haldi, at tað er andstyggiligt.

Hóast trýstið, heldur Tomasson fast: – Vit leypa ikki framav. Vit hava eina ætlan og nakrar dreingir, sum vilja gera alt fyri Svøríki, sigur hann.

Í næsta dysti møtir Svøríki sterka liðnum úr Sveis á heimavølli í Stockholm.

Eftir 3-0 sigurin móti EB/Streymi á Eiði í kvøld, er KÍ á gáttuni at gerast føryameistari 2025.

KÍ hevði alt spælið í fyrra hálvleiki, og tað var rár hending at sundalagsmenn vóru inni á KÍ-hálvuni.

Einki mál kom í fyrra hálvleiki, men í seinna hálvleiki gekk ikki longurhjá EB/Streymi.

Ein góður tími var farin, tá ið Árni Frederiksberg skoraði sítt fyrsta mál. Eitt korter seinni legði hann upp til málið hjá Filip Brattbakk og nakrar minuttir fyri tíð skoraði Árni sítt annað mál í 3-0 sigrinum, sum saktans kundi verið størri.

KÍ skal hava fýra stig í fýra dystum, so eru teir meistarar.

(Skermmynd: Televarpið)

Føroyar fáa kanska ongantíð so góðan møguleika at spæla seg til eitt HM-endaspæl í fótbólti, sum til HM-endaspælið í 2030. Tí tá verða kanska 64 lond við í endaspælinum.

NRK skrivar frá avísini La Nacion, at Forsetin í FIFA, Gianni Infantino, týskvøldið møtti forsetanum í suðuramerikanska fótbóltssambandinum Conmebol í New York.

Har skal eitt uppskort vera lagt fram um at økja talið av luttakandi londum í 2030 til heili 64. Tað er sambært DPA fyrstu ferð, at uppskotið varð lagt fram.

La Nacion skrivar, at tað var Infantino sjálvur, sum tók stig til fundin. Hann skal eisini stuðla ætlanini.

HM í 2030 verður 100 ára hátíðarhald hjá HM-endaspælinum. Uppskotið um 64 lond skal vera ein eingangsætlan.

Verður uppskotið góðkent, verða kanska 128 dystir spældir í HM í 2030. Tað eru tvífalt so nógvir sum í tíðarskeiðinum 1998–2022.

Longu til HM í 2026 verður talið økt úr 32 til 48.

Spanska Aitana Bonmati gjørdist í kvøld tann fyrsta kvinnan at vinna gullbóltin trý ár á rað.

Barcelonaleikarin fekk heiðurin handaðan frá Barcelona-legenduni Andres Iniesta.

– Tað er serligt at móttaka heiðurin frá Iniesta. Eg havi altíð sæð upp til hann og Xavi, segði Bonmati.

– Sum lítil helt eg ikki hetta vera møguligt. Eg sá bara menn á sjónvarpinum, segði hon.

Spania og Arsenal-stjørnan Mariona Caldentey gjørdist nummar tvey.

Fransmaðurin, Ousmane Dembele, vann í kvøld Ballon d’or, sum merkir, hann er ársins fótbóltsleikari.

Hann hevði eitt frálíkt kappingarár og vann saman við Paris SG Champions League og franska meistaraheitið.

Lamine Yamal gjørdist nummar tvey og á plássunum 1-10 komu:

3. Vitinha – Paris Saint-Germain
4. Mohamed Salah – Liverpool
5.Raphinha – FC Barcelona
6. Achraf Hakimi – Paris Saint-Germain
7. Kylian Mbappé – Real Madrid
8. Cole Palmer – Chelsea
9. Gianluigi Donnarumma – Manchester City
10. Nuno Mendes – Paris Saint-Germain

Lamine Yamal vann í kvøld sum tann fyrsti nakrantíð Kopa heiðurin tvey ár ár rað.

Tað hendi undir Ballon d’Or-haldinum, har heiðurin verður givin besta spælara undir 21 ár.

18 ára gamli Yamal hevur nærum ikki verið til at steðga, síðan gjøgnumbrotið sum 15 ára gamal.

Í fjør skoraði hann 18 mál og legði upp til 25, og saman við Barcelona vann hann sponsku greipuna.

Seinasta summar hann hann EM við Spania.

Hjá kvinnunum vann 19 ára gamla Vicky López eisini úr Barcelona Kopa heiðurin.

Víkingur gjørdi aftur í dag sítt til at halda seg á fjórða plássi, sum gevur atgongd til evropeiskan fótbólt næsta ár.

Tað endaði við 2-1 sigri á heimavølli ímóti 07 Vestur. Jørgen Nielsen var stóri maðurin, og hann skoraði bæði málini hjá Víkingi. Tað fyrra kom í 19. minutti, eftir at Aron Jarnskor Ellingsgaard royndi seg við langskoti, og Jørgen var fyrstur á returbóltinum. Tað seinna kom undan steðginum, við uppleggi frá Ara Olsen.

07 Vestur minkaði um munin við sjálvmáli frá Arnbjørn Svensson, og spenningur var til síðsta bríksl.

Hóast tapið, vístu vágamenn gott avrik og eru framvegis omanfyri strikuna.

Víkingur skal næsta sunnudag spæla rættiliga avgerandi dyst um fjórða plássið móti B36 í Gundadali.

KÍ hevur framvegis beina kós móti føroyameistaraheitinum. Sjey stiga í fýra dystum, so er meistaraheitið tryggjað.

Páll A. Klettskarð legði lunnar undir sigurin við tveimum málum í fyrsta hálva tíman. EB/Streymur minkaði til 2-1 við sjálvmáli frá René Shaki Joensen.

Beint eftir steðgin økti Patrik Johannesen til 3-1. Síðan gjørdi Páll A. Klettskarð hattrikk við 4-1 málinum.

Virgar Jónsson svaraði við høvdaramáli til 4-2. Men Daniel Johansen og Mads Bo Mikkelsen staðfestu trivaliga 6-2 sigurin.

Pætur Petersen setti hol á miðskeiðis í fyrra hálvleiki, tá ið B36 vann heili 5-0 í Trongisvági.

Við til søguna hoyrir eisini, at málverjin hjá TB, Anders Tønnesen, beint fyri hálvleik fekk eitt sera ivasamt reytt kort, og tað gjørdi tað sjálvdi sera trupult hjá TB at koma aftur í aftur.

Pætur skoraði eisini málið til 2-0, og síðan økti Marius Kryger Lindh um til 3-0.

Tobias Hansen, sum var á besta liðnum fyri 22. ferð, gjørdist tvífaldur málskjútti og økti um til 4-0 og 5-0.

Stóra tapið setur TB undir trýst undan grannauppgerðini og botndystinum móti FC Suðuroy komandi sunnudag og tað verur uttan málverjan, Anders Tønnesen, sum er leikbannaður

B36 er framvegis í hørðum stríði við Víking um fjórða plássið, sum gevur atgongd til evropeiskan fótbólt komandi kappingarár. Júst B36 og Víkingur spæla í Gundadali komandi sunnudag.

Hóast HB var stórfavorittur, tá ið FC Suðuroy vitjaði í Gundadali í dag, so vóru tað gestirnir loyptu hvøkk á beinanvegin við ein málið, sum Fríði Holm skoraði eftir eitt skjótt mótálop.

HB svaraði aftur eftir eitt korter, og tað var sjálvandi Emil Grønn Pedersen, sum sendi bóltin í málið við einum frálíkum skallara.

Restina av dystinum stríddist HB við at fáa sigursmálið, men tað var ikki nóg góð góðska og neyvleiki í álopsspælinum hjá havnarliðnum.

Best sum alt bendi á eitt óvæntað stig til FC Suðuroy, eydnaðist tað tríggjar minuttir fyri tíð innskifta Heðini Hansen at skall bóltin í málið eftir hornaspark, og so var 2-1 til HB.

HB er á triðja plássi við 52 stigum, tvey stig aftanfyri NSÍ.

Stigatalvan á fsf.fo

NSÍ vann kvøld grannadystin móti B68 á Toftum 3-1.

NSÍ sat á spælinum frá byrjan, og Jasper van der Heyden legði NSÍ á odda í 10. minutti. Tíggju minuttir seinni økti Fabian Ness til 2-0 við einum flottum máli.

Stutt fyri hálvleik minkaði B68 um munin, tá ið Djóni Samuelsen sendi eitt skot á stongina, og bólturin støkk út í ryggin á Kristian Joensen í málinum hjá NSÍ og haðani í málið.

Móti endanum av dystinum fór B68 longri fram og hevði eisini nakrar góðar atsóknir. Men tað var NSÍ skoraði seinasta málið í dystinum í 88. minutti, tá ið Klæmint Andrasson Olsen smekkaði bóltin í netið staddur nakað uttan fyri brotsteigin..

NSÍ hevur nú vunnið allar tríggjar dystirnar móti B68 í ár, og er ósigrað í ellivu dystum og hevur trý stig upp til KÍ, sum tó hevur spælt tveir dystir færri.

FC København var sera nær við at vinna fyrsta dystin í bólkaspælinum í Champions League heima í Parkini móti Bayer Leverkusen.

Jordan Larsson legði danska meistaraliðið á odda eftir bert níggju minuttir, eftir gott upplegg frá Elias Achouri.

FCK hevði fleiri møguleikar at økja, men Leverkusen javnaði við frísparki frá Grimaldo í 82. minutti.

Robert Silva legði FCK fram um aftur í 87. minutti, men eitt sjálvmál frá Pantelis Hatzidiakos í yvirtíðini gjørdi, at dysturin endaði 2-2.

Litríki porturisiski venjarin, Jose Mourinho, var ikki leingi uttan starv.

Nú 62 ára gamli Mourinho hevur skrivað tvey ára sáttmála við Benfica, sum er felagið, har hann hevði sítt fyrsta venjarastarv í 2000.

Hann varð uppsagdur av Fenerbahce fyri einum mánaði síðan, eftir at hann hevði kritiserað nevndina fyri vánaligt flytingararbeiði undan Champions League-playoff dystinum móti júst Benfica.

Hann gjørdist veruliga kendur, tá ið hann førdi FC Porto til sigurs í Champions League í 2004. Hann setti veruliga lit á Premier League sum venjari hjá Chelsea og nevndi seg sjálvan fyri “The Special One”.

Síðan hevur hann vant Inter, Real Madrid, Chelsea einaferð afturat, Manchester United, Tottenham, Roma og Galatasaray.

30. septembur spælir Benfica spæla móti Chelsea í Champions League í London.

• Liverpool – Atlético Madrid 3–2
• Bayern – Chelsea 3–1
• PSG – Atalanta 4–0
• Ajax – Inter 0–2
• Slavia Praha – Bodø/Glimt 2–2
• Olympiacos – Pafos 0–0

Liverpool vann enn einaferð í seinastu løtu, tá ið teir vunnu 3-2 móti Atletico Madrid heima á Anfield í Champions League í kvøld. Liverpool hevur vunnið allar fimm týðandi dystirnar hetta kappingarárið við málum seint í dystinum.

Liverpool kom annars fram um við málum frá Robertson og Salah beinanvegin í dystinum. Men Atletico Madrid stríddi seg inn í dystin aftur. Marcos Llorente minkaði um mundin beint fyri hálvleiki, og javnaði níggju minuttir fyri tíð.

Metkeypið hjá Liverpool, sviin Alexander Isak, spældi eitt sindur meira enn ein hálvleik fyri Liverpool.

Norska felagið Bodø/Glimt, sum fyri trimum árum síðan tapti móti KÌ, spældi í kvøld sín fyrst dyst í Champions League nakrantíð á útivølli móti Slavia Praha úr Kekkia.

Tað sá einki út hjá norðmonnum, tá ið gestirnir førdi 2-0, og teir høvdu brent eitt brotsspark. Men við tveimum málum, sum Daniel Bassi og Sondre Brunstad Fet skoraðu, fekk Bodø/Glimt eitt stig við heim aftur til Noregs.

Hetta er fyrstu ferð síðan 2007, at eitt norskt felag er við í Champions League.

Champions League fótbóltbóltur er í kvøld, og hjá Liverpool byrjar dýrasti leikari í enskum fótbólti nakrantíð, svenski Alexander Isak, á vøllinum í sínum fyrsta dysti fyri Liverpool móti Atletico Madrid á Anfield.

Tann stóra flytingarframhaldssøgan í summar, var um Alexander Isak fór at skifta frá Newcastle til Liverpool, og Isak noktaði at venja við Newcastle í summar.

Endin varð, at Liverpool keypti hann á Seinasta degi, flytingarvindeyga var opið fyri 135 milliónor pund, sum er tað mesta nakað enskt felga hevur givið fyri ein leikara.

Geza Turi sat á beinkinum allan dystin, tá ið Grimsby í gjárkvøldið vann 1-0 á útivølli móti Sheffield Wednesday í 3. umfari Carabao Cup.

Í øðrum umfari, vann Grimsby nógv umtalaða sigurin móti Manchester United, og tá skoraði Geza í brotssparkskappingini. Í gjár sat Geza á beinkinum allan dystin.

Í fjórða umfarið er møguleiki, at møta góðum liðum. Seinastu dystirnir í 3. umfari verða 24. septembur, og vanliga er lutkastið til næsta umfar beint eftir at seinastu dystirnir eru spældir.

Champions League er í gongd aftur.

Arsenal vann 2-0 á Athletic Club Bilbao. Tað vóru innskiftararnir Gabriel Martinelli og Leandro Trossard, sum tryggjaðu sigurin.

Tottenham og danski venjarin Thomas Frank fingu eina gávu, tá iðmálverjin hjá Villareal gjørdi sjálvmál eftir fýra minuttir, sum eisini gjørdist einasta málið í dystinum.

Real Madrid vann tepurt 2-1 á Marseille. Timothy Weah legði franska liðið á odda, men Kylian Mbappé javnaði við brotssparki. Dani Carvajal hjá Real fekk reytt kort fyri stúta ein mótleikara. Men Madrid fekk enn eitt straffi, og Mbappé tryggjaði sigurin.

Juventus og Dortmund spældi ein villan dyst, sum endaði 4-4. Øll málini komu í seinna hálvleiki. Dusan Vlahovic skoraði tvey mál og legði upp til tað seinasta, sum Lloyd Kelly stútaði inn. Juventus tryggjaði sær eitt stig í seinastu løtu.

PSV Eindhoven tapti óvæntað 1-3 móti Union úr Belgia.

Qarabag úr Aserbadjan gjørdi eitt ótrúligt comeback móti Benfica, sum førdi 2-0. Qarabag skoraði tríggjar ferðir, og vann harvið púra óvæntað í Lissabon

Heimsins besta fótbóltskapping, UEFA Champions League, fer í gongd í kvøld. Kvøldsins dystir síggjast niðan fyri, og nøkur stórfeløg eru við frá fyrsta bríksli.

Millum áhugaverdu dystirnar í kvøld eru Atlhletic Bilbao og Arsenal, og Dortmund og Real Madrid

Tvey norðurlendsk lið er við í Champions League. Bodø/Glimt, sum er við fyri fyrstu ferð nakrantíð, spælir ímikukvøldið móti Slavia Praha klokkan 17:45. FC København møtir Bayer Leverkusen mikudagin klokkan 17:45.

Týsdag

• 17:45 – Athletic Club – Arsenal
• 17:45 – PSV Eindhoven – Royale Union Saint-Gilloise
• 20:00 – Benfica – Royale Union Saint-Gilloise
• 20:00 – Qarabag- Juventus
• 20:00 – Borussia Dortmund – Real Madrid
• 20:00 – Marseille – Tottenham

Mikudag

• 17:45 – Olympiacos – Pafos
• 17:45 – Slavia Praha – Bodø/Glimt
• 20:00 – Ajax – Inter
• 20:00 – Bayern München – Chelsea
• 20:00 – Liverpool – Atlético Madrid
• 20:00 – PSG – Atalanta

Hósdag

• 20:00 – Sporting – Kairat Almaty
• 17:45 – Club Brugge – AS Monaco
• 17:45 – FC København – Bayer Leverkusen
• 20:00 – Eintracht Frankfurt – Galatasaray
• 20:00 – Manchester City – Napoli
• 20:00 – Newcastle United – Barcelona

Landsliðsmálverjin, Mattias Lamhauge, var aftur vøllin, eftir at hava verið á beinkinum í seinasta dysti.

Í kvøld stóð hann í málinum hjá Fredericia móti Vejle. Dysturin endaði 1-1.

Talan var um fimta dystin hjá Mattiasi í bestu donsku fótbóltsdeildini hetta kappingarárið.

Vejle kom á odda í 64. minutti við einum skoti frá Amin Chiakha.

Níggju minuttir seinni javnaði Oscar Buch fyri Fredericia eftir gott innlegg frá Patrick Egelund.

Fredericia hevur 11 stig eftir átta dystir og liggur nummar seks í bestu donsku deildini.

Higartil hetta kappingarárið eru tað bara HB, sum hevur megnað at taka stig frá KÍ, sum stýrir beint móti føroyameistaraheitinum.

Í kvøld megnaði Víkingur so at gerast annað liðið í á at taka stig frá KÍ, tá ið tey bæði liðini spældu málleysan javnleik í Klaksvík.

KÍ hevði bóltin nógv mest í fyrra hálvleiki, men eftir steðgin kom Víkingur betri við. Tað eydnaðist tó hvørgum liðunum at skora

KÍ er fremst, seks stig framman fyri Víking, og hevur spælt ein dyst minni.

Víkingur stríðist við B36 um fjórða plássið, og er við javnleikinum í kvøld tvey stig framman fyri hvítsvarta havnarfelagið.

Stigatalvan á fsf.fo >>

Landsliðs leikarin Adrian Justinussen er á vikuliðnum í næstbestu donsku deildini hetta umfarið.

Hann skoraði eitt mál í 3-0 sigrinum hjá Hillerød móti Esbjerg. Poul Kallsberg spældi eisini ein tíma av dystinum

Hillerød er fremst í Betinia deildini eftir níggju dystir við 17 stigum.

Liverpool bíðaða aftur til seinastu løtu at avgera dystin móti Burnley á Turf Moor. Teir vunnu 1-0 við brotssparki frá Mohamed Salah í fimta minutti í yvirtíðini. Liverpoolhevur vunnið allar fýra dystirnar og liggur einsamalt á odda í Premier League við 12 stigum.

Manchester City vann greitt 3-0 á Manchester United í. Phil Foden og Erling Haaland skoraðu málini, og City klatraði upp í topp 8. Hjá United gongur framvegis eitt sindur upp og niður, og tað er stórt trýst á venjaranum Ruben Amorim.

Arsenal vann 3-0 á Nottingham Forest. Martin Zubimendi gjørdist tvímálsskjútti, og Viktor Gyökeres økti til 2-0. Arsenal er á øðrum plássi við 9 stigum.

Tottenham vann 3-0 á West Ham,. Málini skoraðu Sarr, Bergvall og van de Ven. Spurs liggja nú javnt við Arsenal. Tomáš Souček hjá West Ham varð útvístur tíðliga í seinna hálvleiki.

Chelsea og Brentford spældu javnt 2-2. Carvalho javnaði í yvirtíðini, og Chelsea misti leiðsluna.

Newcastle vann 1-0 á Wolves við máli frá nýkeypta Nick Woltemade. Wolves hava enn ikki fingið stig og eru aftast.

Crystal Palace og Sunderland spældi 0-0. Robin Roefs hjá Sunderland bjargaði fleiri ferðir og tryggjaði eitt stig.

Everton og Aston Villa spældi eisini 0-0. Málverjin, Martínez, hjá Villa fekk heiðurin sum besti leikarin. Villa hevur enn ikki vunnið ella skorað hetta kappingarárið.

Fulham vann 1-0 á Leeds við sjálvmáli í yvirtíðini. Fyrsti sigur hjá Fulham í ár.

Bournemouth vann 2-1 á Brighton. Semenyo avgjørdi við brotssparki. Teir eru nú nummar fýra.

Stigatalvan í Premier League

HB og KÍ skulu spæla steypafinalu hjá kvinnum á Tórsvølli leygardagin 27. september.

HB tapti í dag 0-1 fyri Víkingi í Gundadali. Hanna Isaksen Højgaard skoraði í 34. minutti. Sunniva Willemoes fekk reytt kort eftir ein tíma.

Men HB hevði vunnið fyrru hálvfinaluna 3-0 í Sarpugerði, og vann tí samanlagt 3-1.

Við Djúpumýru í Klaksvík vann KÍ stórsigur 7-0 á Skála ÍF. Tóra Mohr skoraði hattrick, Durita Hummeland tvey og Tórun Joensen ,og Maria Vinjardsdóttir Johansen hvør sítt

KÍ vann eisini fyrru hálvfinaluna 3-1 undir Mýruhjalla, og vann sostatt ein samlaðan 10-1 hálvfinalusigur.

Steypafinalan verður ein endurtøka av finaluni 2022, tá KÍ vann 2-1 á HB.

NSÍ og B68 vunnu í dag greitt í 22. umfari í Betri deildini.

Við Løkin í Runavík vann NSÍ 3-0 á TB. Aron Knudsen legði NSÍ á odda í 49. minutti. Klæmint Olsen økti til 2-0 í 54. minutti. Emil Weihe Joensen sló sigurin fastan í 86. minutti. Brandur Olsen legði upp til tvey mál.

Við sigrinum fór NSÍ tvey stig fram um HB, og er nú einsamalt á øðrum plássi.

---

Í Hólmanum á Eiði vann B68 2-0 á EB/Streymi í fyrsta dystinum við Fróða Benjaminsen sum venjara.

Fyrra málið skoraði Patrick Mensah í 48. minutti, og tað seinna skoraði Sebastian Lau Nielsen í 76. minutti.

Um tað ikki var greitt áðrenn, so eru tað nú púra greitt, at B68 er leyst av niðurflyting, og teir kappast nú í staðin við EB/Streym um sætta plássið.

2-2 er eitt merkiliga vanligt úrslit millum HB og B36, og í dag spældu havnarfeløgini fyri aðru ferð í ár 2-2.

B36 byrjaði dystin betri, men sum fyrri hálvleikur leið, setti HB seg á spælið,. Í 21. minutti var ein HB’ari feldur i brotsteiginum, og Emil Pedersen skoraði trygt við brotssparki.

Í seinna hálvleiki yvirtók B36 aftur spælið og hevði eina rúgvu á hornaspørkum. Tað var eisini eftir eitt av hesum hornaspørkum, at bólturin varð skallaður niður til Ragnar Samuelsen, sum beindi bóltin inn um málstrikuna.

Nú sá út til, at HB fór at yvirtaka spælið aftur, men við einum góðum kontraálopi, eydnaðist B36 at leggja bóltin inn fyri úr høgru síðu, og har kom Ragnar Samuelsen flúgvandi og skallaði bóltin í málið.

Nú fall HB í fátt og hevði torført við at fóta sær eina løtu. Tað eydnaðis tó HB at leggja eitt ávíst trýst á, og eftir eitt langt innkast frá Bartal Wardum, eydnaðist Lassana Faye at javna við handaru stong.

Tað komu ikki fleiri mál í Gundadali. B36 fekk flest stig í havnardystunum í ár, meðan André Olsen framvegis ikki hevur tapt í Betrideildini.

Við einum 3-0 sigri í Vági móti FC Suðuroy, fóru vágamenn upp um niðurflytingarstrikuna fyri fyrstu ferð í ár.

07 Vestur avgjørdi dystin longu í fyrra hálvleiki. Silas Gaard legði teir fram um longu í triðja minutti, og tá ið eitt korter var spælt økti Tobias Gusti.

Hóast FC Suðuroy hevði bóltin nógv, so økti Lukas Giessing til 3-0 miðskeiðis í seinna hállvleiki, og so var eingin vegur aftur á FC Suðuroy.

07 Vestur og FC Suðuroy hava nú bæði 13 stig, men vágamenn hava nógv betri málúrtøku. TB er eitt stig aftanfyri, og spælir í løtuni móti NSÍ.