Enn einaferð vísti Lionell Messi øllum heiminum, at er meistarin. Ongland førdi 1-0, men fall aftur á vøllin. Tað gav Messi pláss at stýra “show’inum”, og tað gjørdi hann meistarliga. Hann legði upp til eina rúgvu av møguleikum, áðrenn hann legði upp til tað bæði argentinsku málini.
Hóast Frakland var favortittur, var Spania betra liðið frá byrjan, hevði bóltin meira og megnaði at halda fransmonnum frá allari hóttan.
Tá ið 23 minuttir vóru spældir, var Lucas Digne hjá Fraklandi ikki ordiliga vakin inni í brotsteiginum, og í tí hann skuldi sparka bóltin burtur, kom Lamine Yamal í millum, og Digne rakti bara Yamal, og so var brotsspark.
Mikel Oyarzabal setti brotssparkið trygt í málið.
Spania helt fram við at vera betra liðið og hevði eisini okkurt gott álop, sum saktans kundi givið mál.
Frakland megnaði einafer at senda Kilian Mbappe avstað mitt fyri, men spanski málverjin, Unai Simón, var árvakin og var fyrstur á bóltinum langt uttanfyri brotsteigin.
Sum seinni hálvleikur leið, gjørdist spakuliga risastórur munur á liðunum, og Frakland megnaði einki at gera við samanspælið hjá Spania.
Tá ið næstan ein tími var spældur, legði Pedro Porro eisini Spania fram um 2-0 eftir einfalt eitt-tvey spæl við Dani Olmo.
Løtu seinni var Yamal rangstaddur, tá ið hann sendi bóltin í málið.
Frakland gjørdi eitt lítið sprell miðskeiðis í seinna hálvleiki. Men veruliga vandamikið gjørdist tað ongantíð, og Frakland var merkiliga tamt og vánaligt í kvøld.
Spania vann seg greitt í HM-finaluna, har teir skulu spæla móti Ongland ella Argentina sunnukvøldið klokkan 20.00.
Tvær ferðir fimtan minuttir longd leiktíð mátti til, áðrenn Argentina megnaði at basa Sveis í einum tøttum dysti, har favorittarnir stríddust óvæntað nógv.
Argentina kom á odda tíðliga í dystinum, tá ið Alexis Mac Allister skallaði bóltin í málið eftir hornaspark, sum Lionell Messi skeyt.
Í seinna hálvleiki javnaði Dan Ndoye fyri Sveis við einum skjótum mótálopi, og alt gjørdist ógvuliga spennandi.
Beint eftir fekk Breel Embolo hjá Sveis sítt annað gula kort fyri at blaka seg niður uttan nakar nært við hann, og so mátti hann av vølli. Sveis var í stórum trupulleikum.
Argentina megnaði ikki at gagnnýta yvirtalsstøðuna í vanligu leiktíðini, og heldur ikki í fyrra hálvleiki í umdystinum kom nakað mál.
Men tá ið 112 minuttir vóru spældir, sendi Julian Alvarez eitt hart og neyvt skot í málið, og í yvirtíðini í umdystinum gjørdi Lautaro Martínez gjørdi tað til 3‑1.
Argentina er nú í hálvfinaluni, har England bíðar teimum.
Noreg og Ongland spældu eina góða fjórðingsfinalu í HM í kvøld.
Ongland var leingi betri, men skapti ongan veruligan møguleika.
Tá ið so Noreg einaferð kom longri fram á vøllin eina løtu, var meira bit í, og Andreas Schjelderup hamraði bóltin sera flott í málið úr spíðskum vinkli.
Tað var ikki nógv sum bendi á, at Ongland fór at javna fyri hálvleik. Men Jude Bellingham er sera væl fyri hetta HM-endaspælið, og tá ið Anthony Gordon slap at reka seg leysan í vinstru síðu, og leggja bóltin í føturnar á Bellingham, tók Real Madrid-leikarin eitt gott trekk framvið norsku verjuni, og setti bóltin í málið úr spíðskum vinkli.
Í seinna hálvleik var Noreg leingi betri, og eftir hornaspark høvdu teir eisini bóltin í málinum. Men eftir langa tíð og VAR-døming, valdi dómarin at kolldøma málið, tí Elliot Anderson lat seg detta sera lætt, tá ið Erling Haaland skumpaði hann eitt sindur.
Noreg helt fram at trýsta Ongland langt frammi á vøllinum, og eftir eitt annað hornaspark skallaðu norðmenn á yvirleggjaran, tá ið Jordan Pickford ikki klárðai at boksa bóltin burtur.
Hóast Ongland hevði okkurt gott álop, so var Noreg nógv best allan seinna hálvleik.
Bukayo Saka, sum kom inn í hálvleikinum, var vandamiklasti maðurin hjá Onglandi fram eftir vøllinum, og einaferð breyt hann gjødnum høgrumegin í brotsteiginum, og inni fyri málið, fekk ein norðmaður við neyð og deyð sparkað bóltin til hornaspark
Í longdu leiktíðini var Bellingham aftur upp á spæl. Norski málverjin, Nyland, helt ikki einum langskoti, so so var Bellingham fyrstur á bóltinum.
Noreg trýsti eftir javnandi málinum, Onglan fekk kolldømt eitt brotsspark, og spenningurin var stórur.
Erling Haaland orkaði ikki meira og varð skiftur út, og hóast Noreg royndi og royndi at spæla seg til málmøguleikar, so eydnaðist tað ikki, og tí verður tað Ongland, sum skal spæla hálvfinalu móti Artentina ella Sveis, sum spæla um eina løtu.
Norðmenn kunnu fara stoltir heim. Í kvøld vóru teir minst líka góðir sum Ongland, og sum heilt hava norðmenn spælt góðan fótbólt hetta HM-endaspælið, væl kryddrað við stórskjúttanum og superstjørnuni, Erling Haaland.
Málverjin hjá Manchester United, Senne Lammens, stóð nærum feilleyst í United farna kappingarár, men í gjárkvøldið gjørdi hann ein stóran feil í málinum hjá Belgia, tá ið Spania vann 2-1 og tryggjaði sær pláss í hálvfinaluni.
Fabian Ruiz legði spania á odda við einum skoti eftir væl skipað uppspæl.
Belgia svaraði aftur tá ið Charles De Ketelaere kastaði seg fram og skallaði bóltin í málið til 1-1 stutt fyri steðgin.
Spania hevði bóltin nógv mest í seinna hálvleiki. Men Beliga stóð í móti heilt til innskifti málverjin, Senne Lammens, bjargaði einum skoti, men bólturin fór beint í føturnar á Mikel Merino, sum skoraði 2-1 og avgjørdi dystin.
Spania spælir móti Fraklandi í hálvfinaluni týskvøldið.
Hóast Marokko hevði bóltin rímiliga nógv, so formáddu teir lítið móti krútsterka franska liðnum, og Marokko hevði valla nakran málmøguleika í dystinum.
Hjá Frakland stóð Kilian Mbappe fyri tí mesta. Hann brendi brotsspark í fyrra hálvleiki, skoraði eitt vakurt mál í seinna, legði upp til málið hjá Ousmane Dembélé og fór síðan av vøllinum við einum skaða, sum tó ikki sá so álvarsamur út.
Marokko royndi at hótta móti endanum, men har var einki at gera.
Frakland var betri, og er sum fyrsta landið komið í hálvfinalurnar, har teir spæla móti vinnaranum av fjórðingsfinaluni millum Spania og Belgia.
Nú er greitt, hvørji lond møtast í fjórðingsfinalunum í HM. Fýra spennandi dystir eru á skránni frá hósdegi til sunnudag, og her er eitt yvirlitið.
Hósdag 9. juli kl. 21:00 Frakland – Marokko
Fríggjadag 10. juli kl. 20:00 Spania – Belgia
Leygardag 11. juli kl. 22:00 Noreg – Ongland
Sunnudag 12. juli kl. 02:00 Argentina – Sveis
Sveis brendi eitt brotsspark, meðan Kolumbia brendi tvey. Sostatt er Sveis komið víðari til fjórðingsfinaluna.
Í einum eyðkendum 0-0-dysti endaði eisini málleyst eftir vanliga leiktíð í áttandapartsfinaluni millum Sveis og Kolumbia í kvøld.
Kolumbia byrjaði betri, men annars var tað fyri tað mesta Sveis, sum hevði bóltin tó uttan at skapa nakað.
Í umdystinum hendi meira enn i restina av dystinum. Kolumbia skallaði einaferð á yvirleggjaran og hevði eitt gott langskot, áðrenn Sveis eisini hevði ein góðan møguleika, sum málverji hjá Kolumbia bjargaði.
Kolumbia hevði ein rimmar møguleika í seinna hálvleiki í umdystinum, men hetta var ein dystur, sum var dømdur at enda 0-0, og so var brotssparkskapping.
Í fjórðingsfinaluni bíðar Argentina eftir Sveis.
Gjørdist tað Messi ella Salah, sum spældu seinasta HM-dystin í dag, tað var spurningurin.
Argentina var favorittur, men Egyptaland vór betriu frá byrjan, og høvdu eisini Argentina á knøunum í seinna hálvleiki.
Tá ið eitt korter var spælt, kom Egyptaland fram um. Bólturin varð lagdur inn fyri úr høgru síða, og har vann Yasser Ibrahim luftdystin við Lissandro Martinez og skallaði bóltin í málið.
Løtu seinni missbrúkti Lionell Messi ein gyltyan møguleika at fáa Argentina inn í dystin aftur beinanvegin, men málverjin bjargaði brotssparkinum.
Argentina hevði nú alt spælið og hevði eisini møguleikar at javna, men Egyptaland fór til hálvleiks við 1-0 leiðslu.
Argentina helt fram í seinna hálvleiki uttan at hótta tað stóra, og teir fingu eitt ordans sjokk tá ið umleið eitt korter var spælt. Eftir eitt frálíkt skjótálop, stakk Mohammed Salah bóltin fram til Mostafa Ziko, sum skoraði. Tíverri fyri Egyptaland varð málið kolldømt fyri eitt fríspark í mótálopinum.
Løtu seinni fór Egyptaland í enn eitt frálíkt mótálop, og hesa ferð var eingin VAR-døming, sum kundi kolldøma málið hjá Mostafa Ziko. 23 minuttir eftir og Argentina á knøunum.
Argentina helt fram at koyra í tómgongd, men mál broyta dystir, og tá ið Cristian Romero skallaði bóltin í málið eftir innlegg frá Lionell Messi vaknaði dysturin.
Fýra minuttir seinni fall bólturin fyri Messi, og so var javnleikur.
Og Argentina var ikki liðugt enn. Sum ein ordiligur meistari avgjørdu teir dystin tveir minuttir inni í yvirtíðini, tá ið Enzo Fernández skallaði í málið. Aftur var øgiligt rok, tí Egyptaland vildi hava málið kolldømt fyri eitt fríspark fyrr í álopinum, eins og tá ið teir skoraðu fyrr í dystinum.
Fleiri egyptar fingu gult kort og onkur á beinkinum reytt, men málið var standandi.
Argentina er í fjórðingsfinaluna og spælir móti vinnaranum av Sveis og Kolumbia, sum spæla í kvøld klokkan 21.00.
Belgia fekk nógv nýgg viðhaldsfólk, av søguni um, hvussu Trump blandaði seg í HM, og fekk leikabannið hjá amerikanska, Folarin Balogun, stirkað.
Amerikumenn tyktust mest merktir av óhepnu støðuni undan dystinum, og teir vóru als ikki tendraðir til áttandapartsfinaluna móti Belgia, hóast byrjaði á vøllinum.
Belgia byrjaði dystin nógv betri, og USA kláraði ongantíð at fóta sær, áðrenn Charles De Ketelaere legði Belgia fram um eftir níggju minuttir.
Dysturin javnaði seg nakað, og tá ið hálvur tími var spældur javnaði USA, tá ið frísparkið hjá Malik Tillman varð avrættað og lumpaði Thibaut Courtois í málinum hjá Belgia.
Belgia svaraði aftur longu í næsta álopið. Aftur var tað Charles De Ketelaere, sum var fyrstur á einum innleggi, hesaferð við høvdinum.
USA kom ongantíð veruliga fyri seg í dystinum, og tá ið umleið eitt korter var spælt í seinna hálvleiki, var heilt galið. Amerikanski málverjin, Matthew Freese, misti bóltin uttan fyri brotsteigin, og Hans Vanaken skeyt bóltin í málið.
USA gjørdi eitt lítið sprell, tá ið tíggju minuttir vóru eftir. Men tað vardi stutt, og í longdu leiktíðini staðfesti innskifti aldrandi stórskjúttin, Romelu Lukaku , 4-1 sigurin, eftir enn eitt mistak í verjuni hjá USA.
Belgia bjargaði FIFA undan víðari kreppu, og kanska USA bara skal halda seg til at spæla fótbólt við hondunum, og lata restina av heiminum eiga tað vakra spælið.
Onnur lond verða blakaði úr FIFA, tá ið politiska skipanin í landinum blandar seg upp í fótbóltin,
Belgia skal spæla móti Spania í fjórðingsfinaluni
Í einum lítið áhugaverdum dystin vann Spania at enda 1-0 móti grannunum Portugal í áttandapartsfinaluni í HM. Málið kom í longdu leiktíðini, tá ið Mikel Merino smekkaði bóltin í málið. Spania hevur nú hildið “nullið” seks HM-dystir á rað.
41 ára gamla superstjørnan, Cristiano Ronaldo, spældi allan dystin fyri Portugal, uttan at gera tær stóru skreytirnar. Hann fór grátandi av vøllinum, nú hann helst hevur spælt sín seinasta dyst í HM.
Venjari hjá Portugal Roberto Martínez gevst eisini. Hann sigur, at ein nýggj rødd má til, og at tíðarskeiðið í Portugal nú er liðugt.
Spania er víðari og møtir USA ella Belgia í fjórðingsfinaluni.
Azteca leikvøllurin kókaði av orku, tá ið 87.000 áskoðararnir, harav 5000 enskir, sóu áttandapartsfinaluna millum Meksico og Ongland. Teir gjørdust eisini vitni til ein frálíkan, orkufullan og heningaríkan dyst.
Meksiko hevði vunnið 26 dystir á rað á Azteca og tað er væl skiljandi, tá ið tú sá, hvussu viðhaldsfólkini við sínari orka lyftu sínar kosnu menn í hesum søguliga leikvølli.
Í tunnu luftini í 2000 metra hædd á meksikanska háslættanum setti Mekisko fulla ferð á og helt ferðina allan fyrra hálvleik.
Ongland stóð tó í móti, og tá ið 36 minuttir vóru spældir fór Ongland í skjótt mótálop, sum endaði við, at Bukaya Sako legði bóltin inn fyri í høvdið á Jude Bellingham og var 1-0 til Ongland.
96 sekund seinni skoraði Bellingham aftur. Tey flestu væntaðu, at Harry Kane fór at skjóta, men hann legði bóltin tvøtur um málið til Bellingahm, og so var 2-0.
Meksiko fall tó ikki í fátt, men setti bara enn meira ferð á. Eftir eitt bíligt fríspark kom bólturin innfyri, og har hamraði Julián Quiñones ein leysan bólt upp undir nettakið.
Seinni hálvleikur helt fram við somu ferð. Jarell Quansah hjá Onglandi fekk púra rætt reytt kort fyri eina ljóta takkling, Men løtu seinni var tað Anthony Gordon, sum vann Onglandi eitt brotsspark, sum Kane setti í málið.
Upp aftur eina løtu seinni gjørdi Kane sjálvur eitt brotsspark, sum Raúl Jiménez sendi í málið. So stóð 3-2 til Ongland.
21 minuttir pluss tað leysa var eftir. Meksiko koyrdi á, men orkan var ikki tann sama sum fyrr í dystinum, og teir megnaðu ongantíð veruliga at leggja ógvusligt trýst á verjuna hjá Onglandi.
Ongland reið stormin av sær, og vann ein rimmar sigur á leikvøllinum, har teir fyri 40 árum síðan taptu fyri Argentina og Maradona.
Ongland møtir nú Noregi í fjórðingsfinaluni 11. juli.
Tað, sum nógv stúrdu fyri undan HM, er nú veruleiki. Trump hevur eftir øllum at døma blandað seg beinleiðis upp í HM og fingið FIFA at strika leikbannið hjá amerikanska leikaranum Folarin Balogun.
Balogun fekk reytt fyri at traðka á ein bosniskan leikara, men nú er leikbannið gjørt treytað í eitt ár. Miðlar siga, at Donald Trump ringdi til Gianni Infantino og bað um at FIFA tók málið upp aftur.
Belgiska fótbóltssambandið er ovfarið og sigur, at reglurnar krevja sjálvvirkandi leikbann.
Undan HM strikaði FIFA eisini leikbannið, sum Cristiano Ronaldo átti at havt fyrsta dystin í HM. Tað fekk eisini fótbóltheimin til at undrast, tí slíkt var ikki sæð áður.
Fyrr royndi FIFA at fjala rotinskapin, nú eru hann púra opin.
Norska manslandsliðið í fótbólti skrivaði í kvøld norska fótbóltssøgu, tá ið teir vunnu 2-1 móti ongum minni enn Brasil í áttandapartsfinaluni í heimsmeistarakappingini.
Sigurin var uppiborin, hóast Brasil hevði teir betru møguleikarnar í fyrra hálvleiki. Millum annað bjargaði ein av stóru norsku hetjunum, málverjin, Ørjan Nyland, brotssparki hjá Bruno Guimaraes. Her skal viðmerkjast, at 35 ára gamli Nyland einki felag hevur í løtuni.
Noreg, sum hevði bóltin mest allan dystin, hevði eisini bóltin í málinum tíðliga í fyrra hálvleiki, men málið var kolldømt fyri rangstøðu.
Í seinna hálvleiki hevði Noreg fult tamarhald á støðuni, Teir høvdu framvegis bóltin mest, og hildu Brasil frá øllum.
Og so var tað sjálvandi, Erling Braut Haaland, sum tíggju minuttir fyri tíð skallaði bóltin í málið. Ikki sast norska superstjørnan nógv í dystinum, men tá ið tað galt, so var hann har.
Brasil royndi við øllum listum at koma inn í dystin aftur. Men beint sum vanliga leiktíðin var um at fara, var tað aftur Haaland, sum vísti, at hann dugir at skora. Hesa ferð hamraði eitt flætt skot við vinstra beini millum beinini á einum verjuleikara og inn við stongini.
Ovfarakæti á øllum norðmonnum í heiminum. Men dómarin vildi gera tað eitt sindur spennandi, og gav Brasil eitt bíligt brotsspark, sum Neymar skoraði upp á.
Dómarin legði eisini i merkiliga nógva eyka tíð aftuat teimum sjey minuttunum, sum frammanundan vóru lagdir afturat. Men tað hjálpti einki hjá Brasil, sum má heim eftir eitt tað vánaligast avrikið í HM nakrantíð.
Noreg rør víðari í HM, og allir norðmenn fara at ballast í alla nátt, og helst í fleiri dagar afturat.
Noreg møtir í fjórðingsfinalunum vinnarunum av Mexico og Onglandi, sum spæla í nátt.
Áttandapartsfinalan millum Paraguai og Frakland var akkurát, sum væntað.
Paraguai vardi við øllum snildum og ónollum, meðan Frakland royndi at koma gjøgnum tøttu verjuna hjá Paraguai.
Frakland fann ongan veg til møguleikar, og dysturin var fleiri ferðir rokmikil, og dómaraavrikið var ikki serliga sannførandi.
Tá ið 70 minuttir vóru spældir, fekk Frakland brotsspark eftir VAR-døming. Kylian Mbappé skoraði trygt.
Paraguai hevði einki annað enn ónollur at svara aftur við, og so kom Frakland í fjórðingsfinaluna móti Marokko.
Marokko vísti sína styrki og vann greiðan 3-0 sigur á vertslandinum Kanada í kvøld.
Fyrsta málið kom tíðliga í seinna hálvleiki, tá Azzedine Ounahi smekkaði bóltin í hornið eftir eitt fríspark.
Kanada royndi at svara, men Ounahi økti til 2-0, og innskifti Soufiane Rahimi skoraði triðja málið í síðstu løtu.
Marokko er fyrsta liðið í fjórðingsfinalunum og bíðar eftir vinnaranum millum Frakland og Paraguai.
Kolumbia var nógv betra liðið á vøllinuum í sekstandapartsfinaluni móti Gana.
Jhon Arias skallaði eitt innlegg í netið eftir eitt korter.
Gana fekk ongantíð veruliga spenning í dystin, hóast bara eitt mál var á muni.
Kolumbia hevði alt spælið og nógvar góðar møguleikar. Meðan Gana hevði einki skot á málið.
Hetta var fyrsti sigur hjá Kolumbia í einum røkkstøkkdysti síðan 2014.
Í áttandapartsfinaluni bíðar Sveits í Vancouver týsdag klokkan 21.
Grønhøvduoyggjar vóru nær við, at skapa eitt tað mest óvæntaða úrslitið í HM-søguni. 1-1 stóð á máltalvuni eftir vanliga leiktíð. Tað var tó Argentina, sum vann umdystin 2-1, og heimsmeistararnir er framvegis við í HM.
Argentina hevði alt spælið í fyrra hálvleiki, men spældi ov seint til at skapa nakrar møguleikar.
Tá ið í hálvur tímar var spældur, kom Argentina kortini fram um. Ein langur bóltur varð sendur inn um verjuna til Messi, sum við einari frálíkari temjing og einum líka góðum skoti legði heimsmeistararnar fram um.
So við og við fánaði spælið hjá Argentina, og í seinna hálvleiki komu Grønhøvdaoyggjar nógv betri við í dystin. Tá ið eitt korter var spælt javnaði Deroy Duarte úr spískum, tá ið hann sendi bóltin millum beinini á einum verjuleikara og fram við Emiliano Martínez í málinum.
Grønhøvdaoyggjar høvdu nú dystin akkurát har teir vildu hava hann. Argentina skapti fáar møguleikar, tó at Messi brendi púra leysur. Eisini bjargaði málverjin góðum frísparki frá Messi, og so varð umdystur.
Umdysturin var ikki meira enn byrjaður, so hamraði Lisandro Martínez bóltin í málið úr spískum eftir eitt hornaspark.
Heldur ikki hesaferð vóru Grønhøvdaoyggja lidnar, og Sidny Lopes Cabral skrúvaði bóltin upp í handara málhorn frá vinstra horni á brotsteiginum.
Argentina legði seg enn einaferð fram um, tá ið Cristian Romero skallaði bóltin í málið, eftir hornaspark frá Messi. Málið var skrásett sum sjálvmál.
Hóast Grønhøvdaoyggjar ikki kláraðu at svara aftur hesaferð, so fullu tær við æru og vóru so sera sera nær at vinna ein tann mest skakandi sigurin í HM-søguni.
Argentina spælir móti Egyptalandi í áttandapartsfinaluni.
Brotssparkskapping skuldi til, áðrenn Egypt tryggjaði sær pláss í áttandapartsfinaluni.
Egyptaland legði seg fram um í 13 minutti. Karim Hafez legði fríspark inn fyri úr høgru síðu, og Emam Ashour skallaði bóltin í málið.
Avstralia javnaði tíðliga í seinna hálvleiki. Aiden O’Neill sendi eitt fríspark inn fyri úr vinstru síðu, og Mohamed Hany rakti bóltin óheppið og gjørdi sítt annað sjálvmál í kappingini.
Avstralia royndi at skifta málmann beint áðrenn brotssparkskapping, men tað gjørdi ongan mun.
Egyptaland skoraði fýra ferðir, og Mohamed Salah setti sítt brotsspark trygt í netið. Avstralia misnýtti tvær av sínum royndum og má tí heim.
Egyptaland skal nú spæla móti vinnaranum av dystinum millum Argentina og Grønhøvdaoyggjar.
Týska fótbóltasambandið váttar í morgun, at tíðin hjá Julian Nagelsmann sum landsliðsvenjari hjá “Die Mannschaft” er liðug eftir vánaliga úrslitið í HM.
Nagelsmann bað sjálvur um at sleppa úr starvinum á einum loyniligum fundi við leiðsluna.
Týska fótbólltssambandið boðar eisini frá, at nú verður farið at tosað við litríka fyrrverandi venjaran hjá Liverpool, Jürgen Klopp.
Tað hevur í fleiri dagar ljóðað, at Klopp skal taka yvir, og hann hevur longu víst áhuga at taka við starvinum.
Klopp hevur verið væl umtóktur sjónvarpsserfrøðingur saman við fyrrverandi landsliðsleikaranum, Thomas Müller, undir HM-endaspælinum.
Sveis er komið víðari í áttandapartsfinalurnar í HM eftir 2–0 sigurin á Algeria.
Tað var eitt sindur óvæntað, tí sveisararnir hava ikki vunnið ein røkkstøkkdyst í nógv ár.
Longu í 10. minutti bardi Johan Manzambi seg leysan við baklinjuna vinstru megin málið og fann Breel Embolo, sum setti bóltin í netið.
Beint eftir steðgin var Rafik Belghali óheppin tá ið hann sparkaði bóltin burtur, og Dan Ndoye økti til 2–0 úr 16 metrum.
Sveis hevði tamarhald allan dystin, og skal 7. juli spæla móti vinnaranum á Kolumbia og Gana, sum spæla í nátt klokkan 2.30.
Eftir ein góðan dyst og nógvan VAR-dramatikk kom Portugal víðari í áttandapartsfinalurnar í HM eftir 2-1 sigur á Kroatia.
Portugal hevði alt spælið í fyrra hálvleiki, og nógvir vandamiklir bóltar komu innfyri málið hjá Kroatia. Men miðverjan hjá Kroatia stóð manniliga og helt portugiskum frá teimum heilt stóru møguleikunum.
Fyrstu løtuna eftir steðgin varKroatia nógv betri við í spælinum. Tað gav skjót úrslit, tá ið eitt innlegg úr høgru síðu fór allan vegin tvørtur um málteigin, og har kom eingin annar enn veteranurin, Ivan Perišić , tamdi bóltin og beindi hann í málið.
Hetta var sjeynda málið hjá Perišić í HM-endaspølum, og so nógv hevur eingin annar kroati skorað.
Kroatia hevði fleiri góðar royndir móti portugisiska málinum. Men so brádliga var ein bóltur stendur innum verjuna til Cristiano Ronaldo, sum hegnisliga lyfti bóltin í málið. Hóast tað als ikki sá út, sum rangstøða, so kolldømdi VAR málið.
Løtu seinni skoraði Ronaldo tó endiliga sítt fyrsta HM-mál í einum røkkstøkk-dysti, tá ið Portugal fekk brotsspark eftir púra rætta VAR-døming. Ronaldo skoraði trygt mitt í málið.
Løtu seinni var Ronaldo tikin út, og hóast kroatia framvegis var betra liðið, so bendi alt á longda leiktíð.
Men í teimum tíggju minuttunum, sum vóru lagdir afturat, sendi portugal ein bólt innfyri, og har skallaði Gonçalo Ramos bóltin í málið.
Kroatar náddu at fáa bóltin í málið einaferð afturat, men enn einaferð kolldømdi VAR eitt mál, og so var Portugal víðari í áttandapartsfinalu móti Spania tann 6. juli. Tað verður eisini eitt brak.
Spania hevði tamarhald á sekstandapartsfinaluni í HM móti Eysturríki frá byrjan til enda.
Spania hevði bóltin nærum alla tíðina, og í hinum endanum skapti Eysturríki valla nakran møguleika í 90 minuttir.
Mikel Oyarzabal legði Spania fram um tíggju minuttir fyri steðgin, og miðskeiðis í seinna hálvleiki avgjørdi Pedro Porro í veruleikanum dystin.
Seinasta málið skoraði Mikel Oyarzabal stutt fyri tíð, og so kundu allir viðmerkjarar í heiminum staðfesta, at Spania er um at finna HM-formin, sum kann gera teir til heimsmeistarar.
Lamine Yamal var eisini við frá byrjan fyri fyrstu ferð hetta HM-endaspælið, og hann sá eisini út til at vera á veg rætta vegin, hóasta hann ikki skoraði í dag.
Spania skal 6. juli spæla móti vinnaranum av Kroatia og Portugal, sum spæla á middnátt.
Vertstjóðin USA er komin víðari í áttandapartsfinalurnar í HM, eftir 2-0-sigur á Bosnia-Hersigovina í nátt.
Balogun legði USA á odda í fyrra hálvleiki, men fekk seinni beinleiðis reytt, eftir at VAR vísti, at hann traðkaði á mótstøðuleikaran.
Bosnia fekk lítla yvirvág. Men USA fekk skjótt aftur fatur á rætta endanum, og Tillman økti til 2-0 við einum frísparki, sum tryggjaði sigurin.
Bosnia royndi at svara aftur, men eydnaðist ikki.
USA skal nú spæla móti Belgia.
Belgia, sá út til at hava beina lið úr HM-endaspælinum, tá ið teir vóru aftanfyri 2-0 móti Senegal við bert fáum minuttum eftir at spæla. Belgiskir leikarar skeldaðust, og tað sá einki út.
Men so vendi dysturin. Romelu Lukaku, hvør annar, minkaði til 2-1, og løtu seinni skallaði Youri Tielemans bóltin í málið til 2-2.
Umdysturin nærkaðist endanum, tá ið VAR eftir eina hornasparksstøðu dømdi brotsspark til Belgia. Eitt av teimum brotsspørkunum, sum ongantíð hevði verið dømt uttan VAR. Youri Tielemans hamraði bóltin upp í málhornið, og so var Belgia víðari.
Belgia skal tann 6. julil spæla áttandapartsfinalu móti vinnaranum av USA og Bosnia-Hersigovina, sum spæla í nátt.
Senegal var betra landið stóran part av dystinum, og um miðjan fyrra hálvleik legði Habib Diarra Senegal fram um, tá ið hann var fyrstur á einum leysum bólti, sum hevði rakt stongina.
Belgia kom longri fram á vøllin í seinna hálvleiki og hevði onkran góðan møguleika.
Tað var tó Senegal, sum økti við einum frálíkum máli. Ein langur bóltur var sendur fram til Ismaïla Sarr, sum tamdi bóltin við bringuni og hamraði bóltin í málið.
Tað helt tó ikki hjá Senegal, sum nú fer heim.
Kongo tók Ongland á bóli tíðliga í sekstandapartsfinaluni í HM í kvøld.
Tað vóru bara sjey minuttir farnir, tá ið Brian Cipenga smekkaði bóltin framvið Pickford og legði DR Kongo óvæntað fram um.
Onglendingar vóru skelkaðir og høvdu trupult við at fáa rútmu í spælið.
Eftir steðgin royndu teir at trýsta meira, men Mpasi í kongolesiska málinum hevði fleiri góðar bjargingar.
Men júst tá ið tað sá svartast úr, vísti Harry Kane ábyrgd.
Fyrst skallaði hann bóltin í máið , tá ið eitt korter var eftir. Málverjin hevði hendurnar á bóltinum og átti helst at havt bjargað, men inn fór bólturin.
Tíggju minuttir seinni avgjørdi Kane dystin við einum framúr góðum máli. Í einum trekki setti hann fýra verjuleikarar av í einum, og so hamraði hann bóltin í málið uttan nakran sum helst møguleika hjá málverjanum at bjarga.
Harry Kane vísti harvið, hví tað er so gott at hava eina heimsstjørnu á liðnum. Uttan hann var Ongland ikki komið víðari.
Í áttandapartsfinaluni 5. juli møtir Ongland vertstjóðini Meksiko á tí víðagitna Azteca-leikvøllinum í Meksikobýi.
Hóast Svøríki eftir førimuni gav stórfavorittunum í Fraklandimótstøðu, so var bitin ov stórur at gloypa, og Frakland vann sekstandapartsfinaluna 3-0.
Frakland hevði nógvar góðar royndir í fyrra hálvleiki, og Sviar vóru ikki eiðasørir, tá ið teir fóru fram eftir vøllinum.
Beint sum farið varð inn í yvirtíðina í fyrra hálvleiki, helt ikki longur hjá Svøríki. Kylian Mbappe breyt í gjørgnum í brotsteiginum vinstru megin málið og bendi bóltin inn við handaru stong.
Í seinna hálvleiki økti Bradley Barcola, áðrenn Kylian Mbappe gjørdi tað til 3-0.
Mbappe er nú við seks málum deildur HM-toppskjútti við Lionell Messi. Á tíðarinnar toppskjúttaralista hevur Mbappe skotið 17 mál, tvey aftanfyri Messi.
Frakland møtir Paraguai í áttandapartsfinaluni 4. juli.
Vit minnast HÚ‑rópið hjá íslendskum fjepparum í EM 2016, og nú um dagarnar fylla norskir HM‑fjepparar allar heimsins miðlar við sínum R0‑rópið..
Norðmenn verða ákærdir fyri at hava stolið rópið frá íslendingum. Men søgan er eldri tað.
Upprunin liggur í skotska Motherwell, sum HB skal møta í Conference League síðst í juli.
Í 2014 sóu fjepparar hjá íslendska felagnum Stjarnan taktklappið hjá Motherwell-fjepparum í evropeiskum dysti millum feløgini og tóku tað heim við til Íslands. Síðan gjørdi íslendska fjepparafelagið Tólfan tað til sítt egna HÚ‑róp til EM-endaspælið í 2016.
Norska útgávan er rógva og rópa RO er nýggj, og tað var kendi norski fjepparin Ole Frøystad setta tað í gongd í 2025, og tað fór um allan heimin, tá ið Noreg vann á Senegal í fyrsta dystin i HM.
Føroyskir hondbóltsáskoðarar hava eisini eina føroyska útgávu, sum minnir nógv um ta íslendska útgávuna.
Noreg vann í kvøld 2-1 á Fílabeinsstrondini í sekstandapartsfinaluni í HM.
Eftir ein javna byrjan, tók Fílabeinsstrongin yvir spælið. Men tað varð ikki teir, sum løgdu seg fram um.
Í staðin var tað Antonio Nusa , sum fimm minuttir fyri hálvleik rak inn úr vinstru síðu, tók eitt trekk millum fleiri mótleikarar og bendi bóltin upp í handara horn við einum frálíkum skoti.
Í seinna hálvleiki var tað sum vera man, Fílabeinsstrondin, sum hevði spælið, og tað tyktist bara at vera ein spurningur um tíð, áðrenn teir skoraðu.
Tað hendi í 74. minutti, tá ið Amad Diallo inni í brotsteiginium beindi bóltin í málið við vinstra beininum,
Stjørnuleikarini, Erling Haaland, var sum so ofta rættiliga ósjónligur hjá Noreg. Men fýra minuttir fyri tíð, var hann á rætta stað, tá ið innskifti Patrick Berg hegnisliga legði bóltin fyri føturnar á honum.
Fílabeinsstrondin legði sjálvandi alt fyri at javna, og eitt frálíkt frísparkslangskot hevði beina kós upp í málhornið. Men málverjin, Ørjan Nyland, kom flúgvandi og bjargaði.
Ovfarakæti á norðmonnum bæði á leikvøllinum og um allan heim.
Noreg skal spæla áttandapartsfinalu móti Brasil 5. juli klokkan 21.00.
Marokko eru í áttaandapartsfinaluni í HM-endaspælinum. Teir vunnu móti NIðurlondum eftir 1-1 í ordiliga dystinum og brotssparkskapping.
Dysturin var javnur, og bæði liðini brúktu nógva kropsliga styrki.
Sum heild var Marokko vandamiklari í sínum spæli, meðan Niðurlond í stóran mun lógu afturi á vøllinum í einari fimm bakks ketu og bíðaðu eftir marokkanarum.
Tíðliga í seinna hálvleiki rakti stjørnuleikarin hjá Marokkko, Achraf Hakimi, yvirleggjaran.
Men brádliga fóru Niðurlond í mótálop. Júst innskifti Wout Weghorst skallaði eitt útspark frá málverjanum víðari til alla tíðina vandamikla Crysencion Summerville, sum hart kroystur megnaði at spæla bóltin til púra leysa Cody Gakpo, og so var mál.
Marokko javnaði beint, sum farið var inn í yvirtíðina. Miðverjin, Issa Diop, var júst farin fram í álopið, tá ið hann skallaði eitt innlegg í málið.
Longda leiktíðin helt fram við somu ferð, og Marokko hevði ein rimmar møguleika, men Bart Verbruggen bjargaði.
So var brotsparkskapping. Har brendur Niðurlond trý og Marokko tvey.
Marokko skal spæla móti vertstjóðini Kanada í áttandapartsfinaluni.
Týskland gjørdist tað fyrsta “stóra” landið, sum varð sligið úr HM-endaspælinum.
Tað hendi, tá ið Paraguai vann á Týsklandi eftir dramatiska brotssparkskapping.
Týskland hevði brent tvær ferðir, men so brendi Paraguai tvey tey seinasta brotsspørkini.
Eyka brotsspørk mátti til. Jonathan Tah brendi fyri Týskland, og so sendi Jose Maria Canale Dominguez Paraguai í áttandapartsfinalurnar.
Í sjálvum dystinum hevði Týskland bóltin alla tíðina. Men teir megnaðu ikki at fáa nóg nógva ferð á spælið til at brota tøttu verjuna hjá Paraguai niður.
Í staðin skoraði Julio Cesar Enciso fyri Paraguai í einum av teirra fáu álopum.
Stutt inn í seinna hálvleik eydnaðist Kai Havert at javna, tá ið hann skallaði bóltin í málið, eftir innlegg frá Florian Wirtz.
Týskland helt fram við hugflogsleysa og seina álopsspælinum, sum var lætt hjá Paraguai at verja fyri.
Týskland hevði bóltin í málinum einaferð, tá ið Jonathan Tah skallaði bóltin í málið eftir hornaspark. Men eftir VAR avgjørdi dómarin at kolldøma málið,tí at málverjin fekk eitt sera lítið skump, sum flestu serfrøðingar haldi ikki at givið fríspark.
Týskland má nú tungu leiðina heim. Meðan Paraguai skal spæla móti vinnaranum av dystinum millum Frakland og Svøríki.
Japan legði seg fram um móti Brasil, tá ið Kaishu Sano skoraði í fyrra hálvleiki. Brasil hevði bóltin nógv, men kom ikki ígjøgnum, og Japan helt fast til steðgin.
Í øðrum hálvleiki fekk Brasil tamarhald á dystinum. Casemiro javnaði til 1-1 eftir 56 minuttir, tá ið hann skallaði bóltin í málið við handaru stong. Brasil trýsti støðugt, meðan Japan royndi við seg við mótálopum við sínum kviku spælarum.
Tá 95 minuttir vóru farnir, fall avgerðin. Gabriel Martinelli tók væl móti einari góðari sending frá Bruno Guimaraes og setti bóltin í netið til 2-1
Brasil skal nú spæla áttandapartsfinalu móti vinnaranum av dystinum millum Noreg og Fílabeinsstrondina.
Kanadiska landsliðið í fótbólti skrivaði í kvøld søgu, tá ið Stephen Eustáquio hamraði ein fluktara flatt í málið tveir minuttir inni í yvirtíðini.
Dysturin móti Suðurafrika var tættur og nakað av fjáltri sást á liðunum, og á SoFi leikvøllinum sást, hvussu nógv tað hevði at siga fyri vertslandið at vinna.
Suðurafrika spældi væl, men skapti lítið. Hinvegin var Kanada meira vandamikið. Móti endanum á dystinum yvirtóku teir eisini spælið, og tað gav úrslit.
Í næsta umfari skal Kanada møta vinnaranum í dystinum millum Niðurlond og Marokko.
32 lond eru komin víðari til sekstandapartsfinalurnar í HM, og nú er greitt hvørji lond spæla móti hvørjum.
Hvørjum sekstandapartsfinalum skalt tú hyggja eftir? Her er yvirlit.
Sunnudagur 28. juni
Kl. 20:00 Suðurafrika – Kanada
Mánadagur 29. juni
Kl. 18:00 Brasil – Japan
Kl. 21:30 Týskland – Paraguai
Týsdagur 30. juni
Kl. 2:00 Niðurlond – Marokko
Kl. 18:00 Fílabeinsstrondin – Noreg
Kl. 22:00 Frakland – Svøríki
Mikudagur 1. juli
Kl. 2:00 Meksiko – Ekvador
Kl. 17:00 Ongland – Fólkalýðveldið Kongo
Kl. 21:00 Belgia – Senegal
Hósdagur 2. juli
Kl. 1:00 USA – Bosnia-Hersegovina
Kl. 20:00 Spania – Eysturríki
Fríggjadagur 3. juli
Kl. 0:00 Portugal – Kroatia
Kl. 4:00 Sveis – Algeria
Kl. 19:00 Avstralia – Egyptaland
Kl. 23:00 Argentina – Grønhøvdaoyggjar
Leygardagur 4. juli
Kl. 2:30 Kolumbia – Gana
Lionell Messi byrjaði á beinkinum, tá ið Argentina vann 3-1 á Jordan. Men tá ið hann kom inn eftir ein tíma, skrúaði hann beinanvegin eitt frispark rundan um múrin og skoraði sítt sætta HM‑mál í trimum dystum. Messi hevur nú skotið19 HM-mál tilsamans.
Argentina skifti níggju mans út til dystin, og Giovani Lo Celso og Lautaro Martínez høvdu longu lagt Argentin fram um 2-0, áðrenn Jordan minkaði við Mousa Al‑Tamari.
Í hinum dystinum í bólki K millum Algeria og Eysturríki endaði javnt 3-3. Harvið fóru bæði londini víðari, akkurát sum væntað.
Riyad Mahrez legði Algeria fram um 3-2 í yvirtíðini, men Sasa Kalajdzic javnaði beint aftaná. Úrslitið sendi Iran út av kappingini. Hetta hendi 44 ár eftir “gøluna” í Gijon», og aftur hesaferð vistu liðini, at javnleikur fekk bæði liðini víðari.
Nú skal Algeria møta Sveis, meðan Eysturríki skal spæla móti Spania. Argentina vann bólkinn og møtir Grønhøvdaoyggjum í sekstandapartsfinaluni.
Í bólki K spældu Kolumbia og Portugal í nátt ein sera góðan dyst, har serliga Kolumbia spældi sera góðan og fótbólt, og at enda fekk bóltin í málið. Men málið varð eftir VAR kolldømt fyri rangstøðu, hóast var torført at síggja í endurtøkunum.
Málleysi javnleikurin hevði við sæt, atKolumbia vann bólkin og Portugal gjørdist nummar tvey.
Kolumbia møtia Gana í 1/16-finalunum og Portugal møtir Kroatia.
Í hinum dystinum í bólkinum vann DR Kongo 3-1 móti Usbekistan. Kongo kom harvið víðari á triðja plássi, og skal møta Onglandi 1/16-finalunum.
Á midnátt gjørdist endaliga greitt, at Skotaland er úti úr HM‑endaspælinum, og stutt eftir varð staðfest, at Steve Clarke hevur sagt upp eftir sjey ár sum landsliðsvenjari.
Tá ið Gana tapti 2‑1 fyri Kroatia, var ikki longur møguligt hjá Skotlandi at røkka millum átta teir bestu tríararnar.
Clarke skrivar í einum almennum brævi, at tað hevur verið ein heiður at vera “gaffer”, og at leikararnir hava uppiborið alt rós.
Nú byrjar arbeiðið hjá skotska fótbóltssambandinum at finna ein nýggjan venjara.
Ongland tryggjaði sær við 2-0 sigri á Panama fyrsta plássið í HM‑bólki L.
Jude Bellingham stýrdi í seinna hálvleiki einum hornasparki í netið. Síðan avgjørd Harry Kane dystin og fór fram við Gary á Lineker sum mest skorandi enski leikarin í HM‑søguni við ellivu málum.
Ongland hevði bóltin nógv, men tað var torført at skapa stórar møguleikar, og Panama var eisini vandamikið nakrar ferðir.
Í hinum dystinum vann Kroatia 2-1 á Gana. Petar Sucic skoraði fyrst, men Derrick Luckassen javnaði. Nikola Vlasic skoraði sigursmálið eftir hornaspark frá Luka Modric, sum við 40 ár og 291 døgum gjørdist elsti leikari nakrantíð at leggja upp til eitt mál í HM.
Kroatia og Gana eru víðari sum nummar tvey og trý. Ongland møtir helst Senegal í 1/16-finalujni, meðan Kroatia møtir nummar tvey í bólki K, og Gana skal spæla móti vinnaranum í sama bólki. Kolumnia og Portugal spæla í løtuni um fyrsta plássið í bólki K.
44 ár eru síðan gøluna í Gijon, tá ið Eysturríki og Vesturtýskland spældu ein syndarligan dyst, har ein vesturtýskur 1-0 sigur gjørdi, at bæði liðini komu víðari, samstundis sum Algeria mátti heim.
Í 80 minuttir spældu teir bóltin runt, og Algeria sendi eftir dysti klagu til FIFA, men tað hjálpti einki.
Í nátt klokkan 3.00 kann gølan endurtaka seg, og hesaferð er Algeria beinleiðis umboðað í dystinum, tá ið teir spæla móti Eysturríki fyri fyrstu ferð síðan 1982.
Ein javnleikur kann senda bæði londini víðari, tí bæði hava ein sigur og eitt tap. Eysturríki er nummar tvey orsakað av málmuni.
Messi verður á beinkinum í kvøld, tá ið Argentina spælir seinasta bólkadystin móti Jordan.
Venjarin, Scaloni váttar, at Lionel Messi verður á beinkinum, tí Argentina longu er víðari sum bólkavinnari eftir sigrar á Algeria og Eysturríki.
Messi skoraði hattrick og síðan tvey mál. Nú fáa aðrir spælarar møguleikan, sigur venjarin. Dysturin móti Jordan verður klokkan 3 í nátt.
Arsenal-leikarin, Leandro Trossard, gekk undan, tá ið Belgia vann 5-1 móti Nýsælandi og vann bólk G í HM-endaspælinum.
Belgia hevur havt torført við at skora, men í nátt kom hol á í seinna hálvleiki. Trossard skoraði tvey og legði upp til eitt mál. Kevin De Bruyne, Romelu Lukaku og Alexis Saelemaekers skoraðu hini málini.
Í hinum dystinum í bólki G endaði javnleiður 1-1 millum Iran og Egyptaland. Bæði liðini eru víðari. Iran fekk mál kolldømt á yvirtíðini, og Egyptaland gjørdist nummar tvey í bólkinum.
Belgia spælir móti Suðurkorea í 1/16 finalunum, Egyptaland møtir Australia, meðan Iran ikki kennir mótstøðuliðið enn.
Spania og Grønhøvdaoyggjar eru komin víðari til 1/16-finalurnar í HM.
Grønhøvdaoyggjar eru víðari fyri fyrstu ferð nakrantíð. Teir spældu málleysan javnleik móti Saudi Arabia. Teir spældu tríggjar javnleikir í bólkaspælinum, sum er nokk at koma víðari.
Gleðin var sera stór, tá ið tað var greitt, at landið við 500.000 íbúgvumfólkum var komið víðari. Nú bíða Lionel Messi og Argentina í 1/16-finalunum.
Hinvegin er tvífaldi heimsmeistarin Uruguai úti. Teir taptu 1-0 móti Spania í nátt.
Alex Baena skoraði málið í fyrra hálvleiki, tá ið 40 ára gamla málmanslegendan hjá Uruguai, Fernando Muslera, gjørdi ein stóran feil. Muslera bað sjálvur bað um at verða skiftur út í hálvleikinum.
Spania møtir Eysturríki ella Algeria í 1/16-finaluni.
Norski landsliðsvenjarin, Ståle Solbakken, valdi heldur óvæntað at spara alt liðið í HM-dystinum móti Fraklandi í bólki I.
Bæði liðini vóru komin víðari undan dystinum, sum var um fyrsta plássið í bólkinum.
Ousmane Dembélé legði Frakland fram um beinanvegin og økti eisini til 2-0 um miðjan fyrra hálvleik. Thelo Aasgaard minkaði beinanvegin til 2-1 við góðum málið. Men Ousmane Dembélé var ikki liðugur enn, og skoraði nakrar minuttir seinni til 3-1.
Í seinna hálvleiki hevði Strand Larsen møguleika at minka um munin við brotssparki, men skotið var sera vánaligt. Í yvirtíðini gjørdi Désiré Doué tað til 4-1 til Frakland.
Harvið vann Frakland bólkin, og Noreg gjørdist nummar tvey.
Noreg skal spæla móti Fílabeinsstrondini í 1/16 -finalunum. Frakland møtir væntandi Svøríki.
Senegal tryggja sær triðja plássið og víðari luttøku við 5-0 sigri á Irak. Tað merkir samstundis, at Skotland ikki kemur víðari.
Besta enska liðið seinastu tíggju árini, Manchester City, hevur gjørt avtalu við Nottingham Forest um at keypa miðvallaran Elliot Anderson. Tað skrivar Sky Sports.
Forest hevur givið loyvi til læknakanning, men tað er óvist nær, tí England skal leygardagin spæla móti Panama í HM.
Prísurin er 116 milliónir pund, og tað ger Anderson til dýrasta bretan nakrantíð. Í Onglandi verður spekulera, um at prísurin ikki er 115 milliónir, tí tað minnir ov nógv um tær tiltiknu 115 ákærurnar móti City fyri fíggjarligt óskil.
Anderson er er byrjaður inni báðar dystirnar í HM-bólkaspælinum.
10 teir dýrastu leikararnir í Premier League >>
Torskildi tríararoknskapurin í HM ger, at millum annað Skotland og Svøríki eru í bíðistøðu. Skotland um teir koma víðari, og Svøríki hvørjum teir skulu møta komandi dagarnar.
Skotland tapti 3-0 fyri Brasili og endaði nummar trý í bólki C við trimum stigum og -3 í málmuni. Teir liggja á 8. plássi á triðjaralistanum, har átta av tólv tríarum koma víðari.
Støðan er tøtt og fleiri bólkar eru ikki liðugt spældir, og Skotland hevur sambært Opta bara 5,26% møguleika at koma víðari, og nógv úrslit skulu fella rætta vegin, um Skotland skal koma víðari. Men teir mugu bíða, áðrenn teir kunnu fara í summarfrí.
Svøríki er eisini í óvissu. Teir eru komnir víðari sum tríari, og teir kunnu koma tí ta støðu, at teir skulu bíða til hálvtannað samdøgur áðrenn, hvørjum teir skulu spæla móti í 1/16-finaluni. Møguligt mótstøðuland eru Týskland, Frakland, Noreg, Meksiko ella USA, alt eftir hvussu tríararoknskapurin verður.
Svensku miðlarnir kalla støðuna ótolandi.
Seinastu dystirnir í bólki D í HM vóru spældir tíðliga í morgun.
Paraguai og Avstralia spældu málleysan javnleik, og so vóru bæði liðini víðari til 1/16-finalurnar í HM. Dysturin var sera keðiligur, og ikki løgið um onkur heldur, at úrslitið var avtalað spæl.
Avstralia endar sum nummar tvey í bólkinum, meðan Paraguai endar á triðja plássi við 4 stgum, sum tryggjar teimum at enda millum átta tey bestu londini í tríararoknskapinum.
Í hinum dystinum vann Turkaland 3-2 á USA. Hetta vóru fyrstu stigini hjá Turklandi, og ikki nokk at koma víðari. USA hevði hinvegin vunnið bólkin frammanundan eftir sigrar í tveimum teimum fyrstu dystunum.
USA møtir Bosnia-Hersegovina í 1/16-finaluni, meðan enn er ógreitt hvørjum Avstralia og Paraguai skula spæla móti.
Eina løtu sá ikki gott út hjá Svøríki, men við 1-1 javnleiki móti Japan tryggjaði Svøríki sær triðja plássið í bólki F og víðari luttøku í HM.
Japan var betra liðið stóran part av dystinum, og tíðliga í seinna hálvleiki legði Daizen Maeda Japan fram um.
Síðan yvirtók spælið, og Anthony Elanga javnaði við góðum skoti fáar minuttir seinni.
Móti endanum á dystinum hevði Svøríki fleiri góðar royndir móti japanska málinum, men fleiri mál komu ikki.
Í hinum dystinum í bólki F vunnu Niðurlond 3-1 á Tunesia. Fyrsta málið var sjálvmál. Brian Brobbey økti til 2-0, áðrenn Hazem Mastouri minkaði til 2-1. Jan Paul van Hecke skoraði seinasta málið hjá Niðrulondum.
Japan gjørdist nummar tvey í bólki F.
Tað var sum eitt ævintýr, tá ið Ekvador vendi HM‑dystinum móti Týsklandi og vann 2-1, og harvið spældi seg víðari til 1/32-finalurnar.
Leroy Sané legði Týskland fram um, men Nilson Angulo javnaði skjótt til 1-1.
Í 77. minutti fall avgerðin, tá ið Gonzalo Plata sendi bóltin upp í nettakið
Tað er greitt, at Ekvador kemur víðari, tí liðið er ovast á listanum yvir bólkatríararar við 4 stigum. Nakrir av hinum tríarunum hava longu spælt liðugt og kunnu í mesta lagi fáa 3 stig. Tað er tí ómøguligt, at Ekvador fer niður um 8. plássið í tríararoknskapinum.
Týskland var longu bólkavinnari í bólki E, og Fílabeinsstrondin gjørdist nummar tvey eftir 2-0 sigur móti Kurasau í kvøld.