Tá ið Nicolai Møller Dohn hjá B68 fekk reytt kort fyri eina neyðbremsu, longu tá ið eitt korter er spælt, sá einki út hjá B68, hóast Issah Ahmet Latif frammanundan hevði lagt B68 fram um við beinleiðis hornasparki, sum við hjálp av vindinum fór í málið.

Toftamenn vóru tí undirmannaðir í fimm korter, men teir hildu fast. Skála hevði bóltin nógv í seinna hálvleiki og javnaði til 1-1, tá ið Simon Jørgensen smekkaði bóltin dygst út við stólpan.

Skálamenn trýstu víðari uttan úrslit. Í staðin fekk B68 eitt mótálop og Hanus Højgaard setti bóltin í málið.

B68 vann harvið síni fyrstu stig, meðan Skála framvegis ikki hevur fingið stig.